कैलाली ४ से निर्वाचित प्रतिनिधि ओ प्रदेश सभा सदस्यहे प्रमाणपत्र वितरण
पहुरा समाचारदाता
धनगढी, १० अगहन । कैलाली क्षेत्र नम्बर ४ से निर्वाचित प्रतिनिधि सभा ओ प्रदेश सभाके सदस्यहे प्रमाणपत्र वितरण करल बा ।
शनिच्चरके एक कार्यक्रमके बिच कैलाली क्षेत्र नम्बर ४ के निर्वाचन अधिकृत इन्द्र बहादुर कठायत प्रमाणपत्र वितरण करल हुइट । निर्वाचन अधिकृत कठायत प्रतिनिधि सभामे निर्वाचित नेपाली कांग्रेसके वीर बहादुर बलायरहे निर्वाचित हुइल प्रमाणपत्र वितरण करल रहिट ।
ओस्टके कैलाली क्षेत्र नम्बर ४ के प्रदेश सभा ९१० मे निर्वाचित नेकपा एकीकृत समाजवादीके दीर्घ बहादुर सोडारी ओ प्रदेश सभा ९२० मे निर्वाचित प्रकाश बमहे फेन प्रमाणपत्र वितरण करगैल बा ।
प्रमाणपत्र ग्रहण पाछे बोल्टी प्रतिनिधि सभामे निर्वाचित बलायर निर्वाचन सम्पन्न करैनामे सहयोग करुइया सक्कु निर्वाचन अधिकृतके कार्यालयके कर्मचारी, सुरक्षाकर्मी, लगायत सम्पुर्णहे जनताहे धन्यवाद व्यक्त करले बाटै ।
साथे उहाँ निर्वाचनमे बोलल् प्रतिवद्धता पुरा कैना प्रतिवद्धता व्यक्त करल रहिट । अगहन ४ मे सम्पन्न निर्वाचनमे कुल गिरल ६४ हजार १५८ मत मध्ये बलायर २६ हजार २२० मत पाइल रहिट । एमालेके लेखराज भट्ट २२ हजार ६१३ मत पाइल रहिट ।
प्रदेश सभा ४(१) मे दीर्घ सोडारी १३ हजार ४८९ मत लानके विजयी हुइल रहिट । उहाँके प्रतिस्पर्धी एमालेके भीम देउवा ९ हजार ४२३ मत लानल रहिट । ओस्टके प्रदेश सभा ४(२) मे काँग्रेसके प्रकाश बम बिजयी हुइल रहिट । बम १२ हजार ४७३ मत लानल रहिट कलेसे एमालेके उम्मेदवार हरिसिँह साउँद ११ हजार ९५७ मत लानल रहिट ।
