पत्रकारउप्पर हुइना दुर्व्यवहार विरुद्ध प्रशिक्षण कार्यक्रम सुरु
पहुरा समाचारदाता
धनगढी, १० अगहन । मानव अधिकार सञ्चार प्रतिष्ठान नेपाल (इह्रिकन) के आयोजनामे शनिच्चरके रोजसे धनगढीमे दुई दिने सञ्चार क्षेत्रमे पत्रकारउप्पर हुइना दुर्व्यवहार विरुद्ध प्रशिक्षण कार्यक्रम सुरु हुइल बा ।
उ अवसरमे इह्रिकनके कार्यसमिति सदस्य सम्झना पौडेल कार्यक्रमके बारेमे जानकारी करैले रहि । उहाँ कार्यक्षेत्र, सञ्चारगृह तथा अन्य कामके शिलसिलामे पुरुष तथा महिला दुन्हुनहे हिंसा खेपेपरल ओरसे उ पीडा अनुभव आदानप्रदान करेक लाग कार्यक्रम करल बटैलि ।
ओस्टेक, कार्यक्रममे नेपाल पत्रकार महासंघ सुदूरपश्चिम प्रदेश सदस्य उन्नती चौधरी समाजमे रहल हिंसा नियन्त्रणमे पत्रकारहुकनके भूमिकाबारेमे जानकारी करैले रहि । उहाँ सामान्यतया घरभित्रे नुक्के रहल घरेलु हिंसा, महिला हिंसासम्बन्धी समाचार ओ कार्यक्रमके अध्ययन तथा निर्माण प्रक्रियामे सहभागी होके पत्रकार समाजके वास्तविक मुद्दाके पहिचान कैके हिंसा न्यूनीकरणमे सहयोग करना बटैलि ।
नेपाल पत्रकार महासंघके सञ्चार अनुगमन ईकाइके तथ्यांक अनुसार २०७८ सालमे प्रेस स्वतन्त्रता हनन्के ७५ ठो घटना हुइल ओ यिहिनसे २७२ जाने पत्रकार तथा ९ ठो सञ्चार संस्था कैके २८१ पीडित रहल बटैं ।
इन्टरनेशनल अर्लटके सहआयोजना तथा युरोपियन युनियनके सहयोगमे हुइल कार्यक्रमके सञ्चालन दलित महिला अधिकार मञ्चके परियोजना संयोजक बिमला कडायत करले रहि । कार्यक्रममे टमान बाल क्लबके प्रतिनिधि, किशोरी समूहके प्रतिनिधि तथा पत्रकारहुकनके सहभागिता रहल बा । उ अवसरमे पत्रकार रमा चन्द, भुवन जोशीलगायत अपन अनुभव व्यक्त करले रहैं । कार्यक्रम आज (अँट्वार) सम हुइना बा ।
