स्वाइन फिभर सक्रमित ७० बंगुर नष्ट
पहुरा समाचारदाता
भजनी, १३ अगहन । कैलालीके भजनी नगरपालिकामे एक जाने बंगुर पालक व्यवसायी किसान स्वाइन फिभर सक्रमित ७० बंगुर नष्ट करले बटै । बंगुरमे अफ्रिकन स्वाइन फिभरसे संक्रमण हुइलपाछे भजनीके जयबहादुर बुढासे पालल बंगुर नष्ट करल हो । स्वाइन फिभरके कारण संक्रमित ७० बंगुरहे मंगरके नष्ट करके गारल बा । पालिकाके नगर प्रमुखसहितके उपस्थितिमे मुचुल्का बनाके बंगुर नष्ट करल बा ।
यी आघे ४ सय १२ बंगुर मरसेकल बटै । संक्रमण कारण ९५ लाख २० हजार क्षति हुइल जयबहादुर बुढा दुख पोख्लै । बैंकसे ऋण लेके व्यवसाय करल उहाँ संक्रमणके कारण बंगुर सक्कु नष्ट करे परलपाछे पीडा हुइल बटैलै । आब व्यवसायसे विस्थापित हुई परल उहाँ बटैले बटै । बडी मालिका कृषि प्रवर्धन केन्द्रके सञ्चालक बुढा व्यवसाय बन्द हुइलपाछे फेर व्यवसाय करे सेक्ना अवस्था नइरहल बटैलै ।
आम्दानीके माध्यम ओराके बैंकके ब्याज ओ किस्ता कैसिक व्यवस्थापन कैनता कना चिन्ता बह्रल उहाँ बटैलै । आब टे राहत मिली की कहिके आस करके बैठैना बाहेक और विकल्प नइरहल जयबहादुर बुढा बटैलै । कुुवाँर पहिल सातासे फार्ममे बंगुर मरे लागलपाछे पशुपक्षी अन्वेषण प्रयोगशाला धनगढी ओ केन्द्रीय प्रयोगशाला काठमाडौँमे प्रयोगशाला परीक्षण करेबेर अफ्रिकन स्वाइन फिभर पोजेटिभ डेखल हो ।
बंगुरमे महामारी रोग फैले नइडेना उ क्षेत्र सिल करल रहे । भजनी नगर कार्य पालिकासे प्रदेश तथा संघीय सरकारमे सहयोगके लाग सिफारिस कैना निर्णय करले बा । कार्तिक १५ गते पशुपक्षी रोग अन्वेषण प्रयोगशाला धनगढी ओ केन्द्रद्रीय प्रयोगशाला काठमाडौँमे यी रोग डेखल हो ।
बंगर प्रजातिमे डेखा पर्ना यी रोग कुछ वर्ष पहिले अमेरिका ओ ओकर पाछे चीनमे डेखा परल रहे । यकर कारण बंगेर मरे लागलपाछे गृह सचिव विनोदप्रकाश सिंह, पशु सेवा विभाग काठमाडौँ डा.मुकुल उपाध्याय, पशुपक्षी रोग अन्वेषण प्रयोगशाला धनगढीके डा नरेशप्रसाद जोशी, भेटेरिनरी अस्पताल कैलालीके डा हेमराज अवस्थी समेत स्थलगत अनुगमन करल रहिट ।
