ग्रेडरसे डबके एक बालिकाके मृत्यु
पहुरा समाचारदाता
धनगढी, १५ अगहन । धनगढीमे ग्रेडरसे डबके एक बालिकाके मृत्य हुइल बा ।
धनगढी उपमहानगरपालिका–५ स्थित हसनपुर–पिपल चौतारा सडक खण्डमे बिफेक सकारे साढे १० बजेके समयमे कालिका कन्ट्रक्सनके ना १ क ९७५ नम्बरके ग्रेडरसे डबके १५ वर्षीया चेतना साउदके मृत्यु हुइल प्रहरी जनैले बा ।
जिल्ला प्रहरी कार्यालय कैलालीके प्रवक्ता प्रहरी नायब उपरीक्षक(डीएसपी) वेदप्रकाश जोशी पञ्चोदय माध्यमिक विद्यालय हसनपुरमे ८ कक्षामे अध्ययनरत बालिका साउदके घटनास्थलमे मृत्य हुइल जानकारी डेले । उहाँ बालिका साइकलमे स्कुल जैटी रहल बेला सडकके लेवल मिलैटी रहल अवस्थामे ब्याक कैना क्रममे ग्रेडर ठक्कर डेहल रहे ।
ग्रेडर चालक चितवन भरतपुर महानगरपालिका २८ के २७ बर्षीय विमल कुमालहे प्रहरी नियन्त्रणमे लेले बा । मृतक साउँद पञ्चोदय माध्यमिक विद्यालय कक्षा ८ मे अध्ययनरत छात्रा रही ।
यहोर घटनाके विरोध कैटी विद्यार्थी आन्दोलित हुइल बाटै । विद्यार्थीहुक्रे टायर जरैटी धनगढी–स्याउले सडक खण्ड कुछ बेर अवरुद्ध पारल रहिट । ओस्टके हसनपुर क्षेत्रके पसल व्यवसाय बन्द करैनाके साथे विद्यालय फेन बन्द कराइल रहिट ।
