डगरघाट ओ कृषि क्षेत्रमे विकासके माग
पहुरा समाचारदाता
हसुलिया, १७ अगहन । ढेर जैसिन जनप्रतिनिधिहुक्रे चुनाव आघे अपन चुनावी एजेण्डा लेके भोट मागे अइना मने चुनाव जिटके गैलपाछे अपन कार्यकालसम लौटके मुह नइडेखैना आरोप लागजाइठ ।
मने कैलारी गाउँपालिकाके अध्यक्ष राजसमझ चौधरी स्थानीहुकनके जनगुनासो बुझेक लाग घरदैलोमे पुगके स्थानीयहुकनसे प्रत्यक्ष भेटघाट कार्यक्रम सुरुवाट करले बटै ।
जनताहुकनके जनगुनासो सुने ओ बुझेक तालिका अनुसार भेटघाटके कार्यक्रम आघे बह्राइल गाउँपालिका बटैठै । गाउँपालिका अध्यक्ष अब्बे वडा नम्बर २ के बसौटी गाउँ ओ कैलारी गाउँसे भेटघाट कार्यक्रम करके जनताके गुनासो संकलन करले बटै ।
बसौटी गाउँमे जनतासंग अध्यक्षके प्रत्यक्ष भेटघाट कार्यक्रममे गाउँक भल्मन्सा भुखाली चौधरी यी बरसके लाग होमपाइप, एक ठो कल्भर्ट, सामुदायिक भवन, चोक–चोकमे सडक बत्तीके माग करल रहिट । डिजलके भाउ महंगा हुइटी गैल ओरसे किसानहुकनके आवश्यकता हेरके सिचाई सुविधाके लाग कृषि विद्युत मिटरके व्यवस्था कैडेनाफे भल्मन्सा गाउँक कृषकके ओरसे माग धारल रहिट । बसौटीमे रहल प्रसिद्ध धार्मिक स्थल करमदेव मन्दिरमे सार्वजनिक चर्पी, नल्काके व्यवस्था कैडेनाफे भल्मन्सा भुखाली माग करलै ।
ओस्टेक करके वडा नम्बर २ कैलारी गाउँमे जनतासंग अध्यक्षके प्रत्यक्ष भेटघाट कार्यक्रममे गाउँक भल्मन्सा ठागुराम चौधरीफे काठे पुल हटाके दुई ठाउँमे कल्भर्टके व्यवस्था कैडेना, जिर्ण विद्यालय भवनके मर्मत कैडेना, सिचाईके लाग कृषि मिटरके व्यवस्था करुवा डेना, छाडा गोरुनसे अन्नवाली नोक्सान करटी गैल ओरसे तारवारके व्यवस्था कैडेना माग करल रहिट । भल्मन्सा ठागुराम महिलाहुकनके लाग आयमुलक, सीपमुलक तालिमके व्यवस्था, क्लवहे खेलकुद सामाग्री उपलब्ध कैडेनाफे माग धारल रहिट ।
गाउँपालिका अध्यक्ष राजसमझ जनताके जनगुनासो अनुसार आघे बह्रना प्रतिवद्धता जनैटी पालिकासे शिक्षा, कृषि ओ स्वास्थ्यमे प्राथमिकता डेके आघे बह्रल बटैलै ।
उहाँ कहलै, ‘यी बरस पालिकाभिटर रहल विद्यालयके सक्कु अधुरा भवन सम्पन्न कैजाई, आवश्यकता अनुसारके स्वास्थ्य भवन निर्माण कैना, कृषकहुकनहे सिचाई सुविधाके लाग कृषि मिटरके व्यवस्था कैना प्राथमिकता डेजाई ।’
पालिकासे किसानहुकनके समस्या बुझके असौसे मालपोटमे ५० प्रतिशत छुटके व्यवस्था हुइल, गर्भवती महिलाहुकनके लाग दुसर पालिकामे बच्चा जलमाई जैना अवस्था हुइलेसे नि:शुल्क एम्बुलेन्सके व्यवस्था करल गाउँपालिका अध्यक्ष बटैलै ।
उहाँ कहलै, कैलारी गाउँपालिकामे ढेर सिकलसेलके विमारी बटै, ओइनहे रगत एकदम चाहल ओरसे निशुल्क रगतके व्यवस्था कैगिल, महिला स्वास्थ्य स्वयं सेविका अवकास पैलेसे एक लाख नगद सहिट विदाई कैना पालिकासे निर्णय हुइल बा ।’
सुत्केरी महिलाहुकनके लाग पोषण कार्यक्रम लागु करलफे गाउँपालिका अध्यक्ष बटैलै । वडा नम्बर २ मे १ करोड ९ रुप्यामे स्वास्थ्य भवनके प्रक्रिया आघे बह्रलफे उहाँ जनैलै । प्रत्यक्ष भेटघाटके क्रम गाउँपालिकाके सक्कु ओरसे आइल जनगुनासो संकलन करके प्राथमिकताके आधार अपन कालमे पुरा कैना अध्यक्ष राजसमझ बटैलै ।
