नाटक प्रर्दशनीके लाग एसपीएके ‘नरपिपासु’ छनौट
पहुरा समाचारदाता
धनगढी, १८ अगहन । धनगढीएके एसपीए कलेजके थियटर्स एण्ड आर्टस क्लब ५० हजार अनुदानसहित नाटक प्रदर्शनीके लाग देशभरसे छनौटमे परल बा ।
कथा घर नेपालसे देशभरसे आह्वान करल खुल्ला प्रतिस्पर्धामे सुदूरपश्चिमसे थियटर्स एण्ड आर्टस् क्लब छनौटमे परल हो । काठमाडौंमे रहल कथा घरसे देशभर महिलाके क्षेत्रमे छोट सडक नाटक बनाके अनुदानके लाग खुला आह्वान करल रहे । जेम्ने सपीएके ‘नरपिपासु’ नाटक अनुदानके लाग छनौटमे परल हो । आब क्लबसे उक्त नाटक सार्वजनिक स्थानमे प्रस्तुत करजैना बा ।
देशभरके महिला निर्देशक किल सहभागिता जनाइ पैना उ प्रतिस्पर्धामे एसपीए कलेजके स्नातक तहमे अध्ययनरत् छात्रा आयुष्मा जोशी निर्देशकके भूमिका निर्वाह करले बाटी ।
उहाँसँगे मोरङसे सुमन कुईँकेल बराल, काभ्रेसे सरला पराजुली, ताप्लेजुङसे सबिता अधिकारी, झापासे कबिता नेपाल ओ इलामसे प्रमिला राईके नाटक छनोट हुइल बा ।
आपन नाटक देशभरसे छनोटमे परके अनुदान जिटल ओरसे थप हौसला मिलल आयुष्मा बटैली । ‘देशभरके प्रतिस्पर्धामे अब्बल सावित हुइटी अनुदान पैना आपनमे गर्विलो बात हो । यम्ने दिनरात मिहिनेत करुइया मोर टिमप्रति मै आभार व्यक्त करटुँ,’ आयुष्मा कहली, ‘क्याम्पससे हम्रहीनहे पहिलेसे नै आपन रुचिके क्षेत्रमे काम कैना अभिप्रेरित करटी रहल बा । क्लब नै गठन कैटी हम्रहीनहे अग्रसर हुइना प्रेरितकैना कलेज परिवारप्रति गर्व करटी ।’
उ नाटकमे कलेजके १५ से ढेर टमान पात्रके रुपमे संग्लन रहल बाटै । विद्यार्थीहुक्रनहे रंगकर्मी पुष्पराज अवस्थी प्रशिक्षित करले बाटै । योगमाया, बहुलाकाजीके सपना, सातुके कथा, लिलामे माइलो, सिलान्यास, जंगे पिल्लर, पत्थरके कथालगायत ढेर नाटकमे अभियन करसेकल अवस्थी चिसो मान्छे, के घर के डेरा, जुलेबी, रुदाने लगायत चलचित्रमे फेन अभियन करले बाटै ।
छोट समयमे विद्यार्थीके राष्ट्रियस्तरके अनुदान पाइबर खुशी व्यक्त करलै । आपन प्रयाससे सुदूरपश्चिमके रंग क्षेत्रहे देशमे चिनाइबर मद्दत पुगाइल उहाँ बटैलै ।
एसपीएसे रंगमञ्च तथा कला क्षेत्रमे रुचि हुइल विद्यार्थीनके लाग थियटर्स तथा आर्टस क्लब गठन करले बा । क्लबमे आवद्ध विद्यार्थीनहे रंग क्षेत्रके टमान व्यक्तित्वहुक्रे लानके प्रशिक्षित कराजाइठ् । इहीसे आघे फेन क्लबसे धनगढीके अवसरमे ‘महिषासुर मर्दनी’ नाटकके मञ्चन करसेकल बाटै ।
एसपीएसे आपन विद्यार्थीनके चौतर्फी विकासके लाग टमान १५ ठो क्लबके गठन करले बा । भविष्यमे आपन करिअर आघे बह्राइ चाहना विद्यार्थीनहे आपन रुचिअनुसारके क्लबमे आवद्ध हुइ सेकही । क्लबमे आवद्ध विद्यार्थीनके लाग उहाँहुक्रनके प्रकृति अनुसारके प्रशिक्षण, सेमिनारके व्यवस्था करटी रहल बा ।
इ आधुनिक शिक्षाके उत्कृष्ट नमूना रहल क्याम्पस प्रमुख योगराज उपाध्याय बटैठै । ‘आब किताबी रटानसे किल विद्यार्थीनहे नैपुगठ् । शैक्षिक संस्थासे उहाँहुक्रनके रुचिअनुसारके क्षेत्रमे लग्ना ओ ओम्नेसे अब्बल हुइना प्रेरित करे परल,’ उपाध्याय कहलै,, ‘हम्रे विधार्थीनहे संस्कार ओ अनुशासनयुक्त अध्ययनसँगसँगे पसिना ओ कर्ममे विश्वास कैना बनैठी । एसपीएसे अध्ययनसँगसँगे विद्यार्थीहुक्रनके भविष्यके फेन सुनिश्चितताके लाग काम करटी रहल बा ।’
झण्डे ३५ सय विधार्थी अध्ययनरत् एसपीए सुदूरपश्चिमके अग्रिणी शैक्षिक संस्था हो । एसपीएमे स्नातकोत्तर तहमे एमएड, एमबीएस, स्नातक तहमे बीए, बीबीएस, बीएड, बीएचएम, बीआईएम, एकवर्षे बीएड तथा प्लस टूमे विज्ञान, व्यवस्थापन, शिक्षा, मानविकी, कानुन, होटल म्यानेजमेन्ट, आमसञ्चार ओ पत्रकारिता विषयमे अध्ययन अध्यापन हुइटी आइल बा ।
कलेजमे पूर्ण रुपमे मल्टिमिडियायुक्त कक्षाकोठा रहल बावै । सक्कु कोठामे सिसी टिभी क्यामेरा जडान करल बावै । आधुनिक कम्प्युटर तथा विज्ञान प्रयोगशालामे विधार्थीहुक्रनहे प्रशिक्षित कराजाइठ् । डुरसे अउइया विधार्थीके लाग कलेज बसके व्यवस्था कैनाके साथे ओ होस्टेलके समेत व्यवस्था करल बा ।
