पत्रकार रावलहे जेसीजसे सम्मान

पहुरा समाचारदाता
टीकापुर, १८ अगहन । टीकापुर जेसीजसे नेपाल पत्रकार महासंघ सुदूरपश्चिम प्रदेश समितिके अध्यक्ष योगेश रावलहे सम्मान करले बा ।

टीकापुर जेसीजके साप्ताहिक कार्यक्रम अन्तर्गत बृहत् रक्तदान कार्यक्रममे हालसम ५०औंचो रक्तदान करल कहटी अध्यक्ष रावलहे सम्मान करल हो । दुई दशकसे ढेर समयसे पत्रकारिता कैटी आइल रावल नागरिक दैनिकके कैलाली सम्बाददाता तथा डल्फिन मिडिया प्रालिसे सञ्चालित हाम्रोपत्रके प्रधान सम्पादक हुइट । रक्तदान कार्यक्रमके संयोजक पदमबहादुर शाही रावलहे स्वतः स्र्फुतरुपमे ५० औं चो रक्तदान करल कहटी सम्मान करल बटैलै ।

‘एक दुईचो रगत डेहे नैमनुइया हमार समाजमे ५०औंचो नियमित रक्तदान कैना सामान्य बात नैहो’ शाही कहलै‘औरे युवानहे प्रेरणा मिले कहक लाग समेत हम्रे उहाँहे सम्मान करल हुइटी ।’

रक्त समूह बी पोजेटिभ रहल रावल आत्मसन्तुष्टिके लाग नियमित रुपमे रक्तदान कैटी आइल बटैलै । सम्मानित हुइलमे खुशी व्यक्त कैटी रावल कहलै‘रगतके अभावमे कोइ फेन ज्यान गुमाइ नपरे ओ केक्रो ज्यान बचे कना चाहना होके नियमित रक्तदान कैटी आइल बाटु ।’ ‘औरे बेला सुई लगैना ढेर डरैना मै रक्तदान करेबर भर आनन्द महशुस कैठुु’ रावल कहलै ‘स्वास्थ्य साथ डेहटसम नियमित रुपमा रक्तदान करम ।’

रावल रक्तदान करल ९० दिन पुगलपाछे रक्तदान कैटी आइलमे अब्बेभर आवश्यकता परल बेला रगत डेना करल बटैलै । ‘पहिले ९० दिन कटलपाछे अअपनहे जाके डेके आउ’ उहाँ कहलै ‘कतिपय बेला हमार रक्त समूहके रगत नैपाके विरामीहे समस्या हुइना करल पता पाइलपाछे आवश्यकता परल बेला डेना करठु ।’

टीकापुर अस्पतालमे टमान रोगके उपचार तथा शल्यक्रिया हुइ लागलपाछे रगतके खपत वृद्धि हुइटी आइल बा । नेपाल रेडक्रस सोसाइटी टीकापुर उपशाखाके अनुसार मासिक एक शय पिन्टसे ढेर रगत खपत हुइटी आइल बा ।