धनगढीमे ‘नेपथ्य लाइभ कन्सर्ट’ हुइना
पहुरा समाचारदाता
धनगढी, १ पुस । पुस ३ गते धनगढीके रंगशालामे ‘नेपथ्य लाइभ कन्सर्ट’ हुइटा ।
शुकके रोज धनगढीमे पत्रकार सम्मेलन कैके मानवता प्रवद्र्धनके साथे मानवसेवा आश्रमके भवन निर्माण तथा अक्षयकोष स्थापनार्थ चर्चित सांगीतिक समूह नेपथ्य व्याण्डसँगके सहकार्यमे मानवसेवा आश्रम नेपाल उ लाइभ कन्सर्ट करना जानकारी करैले बा ।
‘नेपथ्य लाइभ कन्सर्ट’ नेपालके प्रमुख १० शहरमे आयोजना हुइना आयोजक जनैले बा । ओहे अवसरमे मानवसेवा आश्रम कैलाली शाखा पुस ३ गते धनगढी रंगशालामे कन्सर्ट करे लागल हो । यी संगीत यात्राके छैटौं कार्यक्रम हो ।
‘मानवताके लाग संगीत’ कना नाराके साथ अन्तराष्ट्रियस्तरके उ लाइभ कन्सर्ट महिनाव्यापी मानवीय अभियान रहल संस्थाके केन्द्रीय सदस्य आदर्श ढकाल जानकारी करैलैं ।
मंसिर १६ गतेसे शुरु हुइल कार्यक्रम पुस १६ गते काठमाडौंमे पुगके समापन हुइना उहाँ जानकारी करैलैं । धनगढीपाछे पुस ६ गते सुर्खेतके खुल्ला मञ्च, ९ गते बुटवलके कालिका मानवज्ञान मावि, १२ गते पोखराके प्रदर्शनी केन्द्र ओ १६ गते काठमाडौंके भृकृटीमण्डपमे कन्सर्ट हुइना बा ।
यीआघे मंसिर १६ गते विराटनगर, १९ गते वीरगञ्ज, २२ गते हेटौडा, २५ गते चितवन र २९ गते नेपालगञ्जमे उ कन्सर्ट होसेकल बा । मानवसेवा आश्रम धनगढी शाखा आजसम २ सय २१ जहनके उद्धार करल ओ हाल ५९ जाने आश्रित रहल आश्रम जनैले बा ।
