‘वनुवाँसे साझेदारी कैके सीपमूलक कार्यक्रम कैना’
सागर कुस्मी
कंचनपुर, १ पुस । कंचनपुरके कृष्णपुर नगरपालिका ६ बन्जरिया स्थित महाकाली सामुदायिक वन उपभोक्ता समुहके वार्षिक साधारण सभा निप्टल बा । सामुदायिक वनके १५ औं साधारण सभा हुइल हो ।
साधारण सभाके बर्का पहुना कृष्णपुर नगरपालिकाके नगर प्रमुख हेमराज ओझा कार्यक्रम उदघाटन कैले रहिंट । कार्यक्रममे बटवइटी उहाँ नगरपालिका भिट्टरके सामुदायिक वन मन्से महाकाली सामुदायिक वन उत्कृष्ट रहल बटैलैं ।
अइना दिनमे सामुदायिक बनुवाँसे साझेदारी कैके सीपमुलक कार्यक्रम संचालन कैना उहाँ बटैलैं । बनुवाँ संगे सहकार्य कैके उपभोक्तनके आयस्तरमे वृद्धि करक लाग कार्यक्रम सञ्चालन कना उहाँके कहाइ बा ।
“सामुदायिक बनुवाँमे बाँस, बेंट ओ निमुवाँ खेती करक लाग कार्यक्रम सञ्चालन कर्बी“, उहाँ कहलैं, “बेंटबाँससमे आधारित उद्योग सञ्चालन कैके स्थानीय स्तरमे स्वरोजगारके अवसर डेना योजना बनैटी बटि ।“
अत्तरिया सव डिभिजन वन कार्यालयके सहायक वन अधिकृत निरञ्ज कडाल वैज्ञानिक वन कार्यक्रम सञ्चालन हुइल सामुदायिक वनके कार्यक्रम घिनापुची हुइल ओर्से ओकर लाग सम्बन्धित निकाय ध्यान डेहे पर्ना बटैलैं । आब अइना दिनमे सामुदायिक बनसे आम्दानी हुइल रकमसे स्थानीयस्तरमे सीपमुलक काममे जोर डेना उहाँके कहाइ रहे ।
अध्यक्ष वीर बहादुर राजवंशी दुई बरससे सामुदायिक बनुवाँमे पुनः उत्पादनके कार्यक्रम बाहेकके कार्यक्रम सञ्चालन हुइल बटैलैं । स्वरोजगार मुलक ढेर काम कर्टी आइल ओ भविस्यमे आकुर ढेर मजा मजा कार्यक्रम कैना उहाँ कहलैं । कानुन संगे जोरल राजनीतिक रुपमे समुदायमे कैयो मेरिक विकासके कार्यक्रम हुइ पर्ना उहाँ बटैलैं ।
साधारण सभामे भौतिक पूर्वाधार निर्माणमे सहयोगी सहायक वन अधिकृत निरन्जन कडारा, सामुदायिक वनहे अतुलिनिय योगदान डेहुइया जोगराज चौधरी, सामुदायिक वनके पूर्व सल्लाहकार धन बहादुर मल्ल ओ सुशासित तथा विशष्ट कार्य करल मेख बहादुर कडालहे सम्मान कैगैल रहे ।
साधारण सभासे अध्यक्षमे वीर बहादुर राजवंशी फेनसे चयन हुइल बटैं । सामुदायिक वनके १५ औं साधारण सभासे डुसरा कार्यकालके लाग राजवंशी अध्यक्ष पदमे चयन हुइल हुइँट् । इ राजवंशीके डुसरा बार हुइन अध्यक्षके जिम्मावारी भेटैलक् ।
सामुदायिक वनके साधारण सभासे उपाध्यक्षमे निसान्त खडका, सचिवमे देवकी नेगी, सहसचिवमे सुशिला चौधरी, कोषाध्यक्षमे कालुसिंह डंगौरा चयन हुइल बटैं । साधारण सभासे चयन हुइल लावा अध्यक्ष राजवंशीके अन्सार टोल भेलासे सामुदायिक वनके पहिल बैठकसे तीन जना सदस्य चयन कैना जान्कारी करैले बटैं । पहिल बैठकदे एक जाने दलित, एकल विपन्न ओ एक जाने महिला कैके तीन जाने सदस्य मनोनित कैना समिति जनैले बा ।
ओस्टेके इहिसे ओ पहिले फेन महाकाली सामुदायिक बनसे ढेर आयमुलक काम हुइल बा । गैल बरस लहँगा चोलिया, डोना टेपरा, बेंटबाँस लगायतके स्थानीय ओइनहे स्वरोजगार हुइनामे ढेर मद्दत हुइल स्थानीय कमला देवी चौधरी बटैलैं ।
इहिसे आउर आघेक बरससे गाउँमे तीन टोलमे घुम्टी कोष संचालन हुइटी आइल बा । घुम्टी कोष अन्तरगत छेगरी पालन, मुर्घी पालन, बंगुर पालन ओ छोटछोट व्यापार व्यवसायमे सामुदायिक बनसे मद्दत हुइटी आइल अध्यक्ष राजवंशी बटैलैं ।
कार्यक्रममे स्वागत मन्तव्य गणेशबहादुर बुडथापा ओ आर्थिक प्रतिवेदन कोषाध्यक्ष कालुसिंह चौधरी सुनैले रहिंट । कार्यक्रममे बन्जरिया गाउँके कुछ सांस्कृतिक रमझम फेन डेखागैल रहे । महाकाली सामुदायिक बन गुलरिया बजारसे २ किलोमिटर डख्खिन लालझारी बनुवाँसे जोरल बा ।
