नवजीवन सहकारी ३० औं बरसमे प्रवेश
४ अर्ब ०९ करोड १३ लाख रुप्या निक्षेप संकलन
पहुरा समाचारदाता
धनगढी, २ पुस । सुदूरपश्चिम प्रदेशके अग्रणी सहकारी नवजीवन सहकारी संस्था लिमिटेड २९औं बरस पार करके ३० औं बरसमे प्रवेश करले बा ।
२०४९ सालमे सामुदायिक बचतक कोषसे सुरु हुके २०५० साल अगहन ३० गते से विधिवत रुपमे यी क्षेत्र ओ देशके अग्रणी सहकारी संस्थाके रुपमे स्थापना हुइल यी नवजीवन सहकारी संस्था लिमिटेड ऐतिहासिक २९औं बरस पुरा करके ३०औं बरसमे प्रवेश करल हो ।
यी सहकारी ३०औं बरसमे प्रवेश करटी रहल बेला संस्थाके अधिकृत शेयरपूँजी रु. ५० करोड रहल बा । जेम्ने मन्से २०७८ साल असार मसान्तका चुक्ता शेयर पूजी २२ करोड १८ लाख ८२ हजारमे २१.४९ प्रतिशतसे वृद्धि हुके २०७९ असार मसान्तसम चुक्ता शेयर पूंजी रु. २६ करोड ९५ लाख ६८ हजार पुगल बा । सहकारीके २०७८ असार मसान्तमे शेयर सदस्य संख्या २३८६२ रहलमे ओम्ने बृद्धि हुके २०७१ असार मसान्तमे ३० हजार ४४२ पुगल ओ जगेडा कोषमे उल्लेख्य रकम वृद्धि हुइटी रहल संस्थाके अध्यक्ष देवबहादुर बम बटैलै ।
मुनाफा आर्जन
यी संस्थासे आर्थिक बर्ष २०७८/०८९ के आर्थिक कारोवारसे ११ करोड ५६ लाख ३६ हजार संचालन मुनाफा आर्जन कैना सफल हुइल बा । उ यी सहकारीके असार मसान्तसम लगानीमे रहटी आइल कर्जा ३ अर्ब ८६ करोड ९१ लाख ७८ हजार रहल बा ।
बचत संकलन
संस्थासे गैल आर्थिक वर्षमे देशके वित्तीय क्षेत्रमे डेखा परल तरलता संकुचन तथा कोभिड १९ (कोरोना) महामारी एवम विश्वमे डेखा परल आर्थिक मन्दिके बाबजुद फे गैल वर्षके निक्षेप रु. ४१ करोड ९७ लाख ५२ हजार रहलम गैल बर्षके निक्षेपके तुलनामे ३.०४ प्रतिशतसे ऋणात्मक हुके २०७९ साल असार मसान्त सममे संस्थासे कूल रु. ४ अर्ब ०९ करोड १३ लाख ३० हजार निक्षेप संकलन कैना सफल हुइल अध्यक्ष बम बटैलै ।
बजारमे रहल और बैंक वित्तीय संस्थामेफे निक्षेप संकलनमे कमी आके कर्जा लगानी योग्य रकम अभावके कारण तरलता संकुचन आइल समयमेफे यी संस्थासे र्याप्त तरलता मौज्दात कायम कैना सफल हुइल उहाँ बटैलै ।
संस्थासे यी आर्थिक बर्षके अन्तमे संस्थामे २१.३४ प्रतिशत तरलता कायम रहल जनैले बा । आर्थिक बर्ष २०७८/०७९ के असार मसान्तमे नगद बैंक मौज्दात रु. ८७ करोड ३१ लाख ९७ हजार रहल जनैले बा । यी आर्थिक वर्षमेफे संस्थासे पर्याप्त तरलता कायम करले बा ।
संस्थाके आर्थिक बर्ष २०७९/०८० के लाग लक्षित कार्यक्रम
सहकारी विभाग से स्वीकृति लेसेकल थप सेवा (डडेल्धुरा, काठमाण्डो) सञ्चालन करेक लाग सम्भाव्यता अध्ययन करके आवश्यकता अनुसार उपरोक्त स्थानमे सञ्चालन कैना जनैले बा । अइना समयमे थप सेवा केन्द्र सञ्चालनमे नानेक लाग कैलाली जिल्लाके बौनिया, लम्की बजार ओ सहजपुर, कञ्चनपुर जिल्लाके बेलौरी, गुलरिया, झलारी ओ महेन्द्रनगर बजार ओ बर्दिया जिल्लाके राजापुर, भुरिगाँउ, गुलरिया तथा सानोश्री बजारहे समेत अध्ययनके क्रममे धारल जनागिल बा ।
कञ्चनपुर जिल्लाके महेन्द्रनगर बजारमे यी संस्थाके सेवाकेन्द्र सञ्चालन करेक लाग उ स्थानमे रहल बचत तथा ऋण सहकारी संस्थासंग मर्जरके प्रकृया आघे बढाके हाली सेवा केन्द्र सञ्चालन कैना जनैले बा । संस्थाके अत्तरीया शाखाके लाग खरीद करल जग्गामे भवन निर्माण कार्य सम्पन्न हुइना क्रममे रहल ओरसे यिहे आ. व भिटर उ भवनसे संस्था सेवा संचालन कैना कहले बा । संस्थासे ओकर लाग आवश्यक बजेट रु. ३ करोड ५० लाख विनियोजन करले बा ।
संस्थाके प्रधान कार्यालय ओ धनगढी शाखा समेत रहल भवनमे थप निर्माण कार्य आवश्यक रहल कहटी ओकर लाग रु. १ करोड २५ लाख बजेट विनियोजन करले बा ।
संस्थाके बाँसगढी बर्दीया शाखाके लाग घर घडेरी खरीद करेक लाग रु. ३ करोड विनियोजन करले बा । गोदावरी न.पा. ८ मजगाउ स्थित जमीनमे स्थापना हुइल खाद्य गोदाममे कृषि उपज संकलन, भण्डारीकरण, प्रशोधन एवम् बजारीकरण कैना ओ उहे जमीनमे कुटानी पिसानी ओ पेलानी उद्योग सञ्चालन करेक लाग यी वर्ष २ करोड बजेट विनियोजन करले बा ।
सहकारीसे २९ औं वार्षिक साधारणसभा
नवजीवन सहकारी संस्था लिमिटेडसे शनिच्चरके रोज २९औं बार्षिक साधारणसभा कार्यक्रम एक कार्यक्रमके विच मनैले बा ।
संस्थाके अध्यक्ष देवबहादुर बमके अध्क्षतामे हुइल कार्यक्रममे वडका पहुना सुदूरपश्चिम प्रदेश प्रमुख देवराज जोशी रहल रहिट । ओ विशिष्ट पहुना सुदूरपश्चिम प्रदेशके पूर्व आर्थिक मामिला मन्त्री तारालामा तमाङ रहिट ।
