नेपाल पत्रकार महासंघ कैलालीके १२ औं साधारणसभा
पहुरा समाचारदाता
धनगढी, २ पुस । नेपाल पत्रकार महासंघ कैलाली शाखाके १२औं साधारणसभा शनिच्चरके रोज धनगढीमे निम्जल बा ।
सुदूरपश्चिम प्रदेशके मुख्यमन्त्री त्रिलोचन भट्टके वडका पहुनामे हुइल कार्यक्रममे उहाँ पाँच बरससे प्रदेश सरकारसे ढेर काम हुइल बटैलै । उहाँ कहलै, आब लौव सरकार आइटे उ कटरा काम करे सेकठ ओकर आधारमे कामके मुल्याङक हुई ।
मुख्यमन्त्री भट्ट जटरा तिट हुइलेसेफे पत्रकारसे यथार्थपरक समाचार लिखे पर्ना बटैले बटै । पत्रकार आचारसंहिता पालनामे पत्रकारसे अभिन मेहनत करे पर्ना उहाँ सुझाव डेलै । पत्रकारिता समाजके ऐना हो, अब्बेफे ग्रामीण क्षेत्र ओ सुदूरपश्चिम विकाससे वञ्चित हुइलओरसे ओम्ने पत्रकारसे भूमिका खेले परठ उहाँ कहलै ।
सुदूरपश्चिममे गौरवके आयोजना सञ्चालन नइहुके यहाँके विकास हुई नइसेकल मुख्यमन्त्री भट्ट कहलै, भारी परियोजना नइहुके सुदूरपश्चिमवासी रोजगारीके अवसरसेफे वञ्चित हुइलै ।’ मुख्यमन्त्री भट्ट काम कैना प्रणालीमे परिवर्तन करे नइसेक्के जनताहे सन्तुष्ट बनाई नइसेकल चर्चा करलै ।
प्रहरी ओ निजामति जैसिन महत्वपूर्ण ऐन संघीय सरकारसे पारित नइकरडेहेबेर प्रदेश सरकारहे काम कैना कठिन हुइल उहाँ बटैलै । महासघके कैलाली अध्यक्ष हिमालय जोशीके अध्यक्षतामे हुइल कार्यक्रममे महासघके केन्द्रीय सचिव हेमकर्ण विक, कैलाली जिल्लाके सहायक प्रमुख जिल्ला अधिकारी यज्ञराज जोशी, नेपाल पत्रकार महासंघके केन्द्रीय सदस्यद्वय उत्तर विष्ट, भरत शाह ओ वरिष्ठ पत्रकार चित्राङ्ढ थापा,कैलाली उद्योग वाणिज्य संघके वरिष्ठ उपाध्यक्ष पुष्कर ओझा, वार कैलालीके सचिव प्रेम शाही लगायत साधारण सभाके सफलताके शुभकामना व्यक्त करले रहिट ।
साधारण सभाके बन्दसत्रमे सचिव प्रेम चौधरीसे सांगठनिक प्रतिवेदन ओ कोषाध्यक्ष लक्ष्मी प्रसाद जैशीसे आर्थिक प्रतिवेदन प्रस्तुत करल रहिट । बन्द सत्रसे पत्रकार ओ पत्रकारितासंग सम्बन्धित टमान ५ ठो निर्णय करले बा ।
अध्यक्ष जोशीके अनुसार पत्रकार महासंघके सदस्यता शुद्धिकरणहे निरन्तरता डेना, प्रादेशिक तथा स्थानीष्य संचारनीतिबारे पत्रकार आचारसंहिता ओ आचारण, पत्रकार ओ संचारगृहके पेशागत सुरक्षा, सवलीकरण, पक्रकार महिलाके शसत्तीकरण ओ सवलीकरणलगायतके निर्णय हुइल बा ।
अध्यक्ष जोशी पत्रकार महिलाके पेशागत क्षमता अभिबृद्धि ओ पेशामे टिकैटी रहना नीतिगत व्यवस्था कैना, स्थानीय तह लगायतके निकायसे बनैना सञ्चार नीतिहे पत्रकारमैत्री बनैना आवश्यक भूमिका महासंघसे खेल्न निर्णयफे करल बटैलै । धनगढीस्थित होटल इमेजमे हुइल साधारण सभामे महासंघके साधारण सदस्य तथा टमान सञ्चार माध्यममे कार्यरत पत्रकारहुकनके सहभागिता रहे ।
