स्थानीयस्तरमे रोजगारी सृजनाके लाग उद्यमशिलता विकास तालिम
पहुरा समाचारदाता
हसुलिया, ४ पुस । कैलाली जिल्लास्थित कैलारी गाउँपालिकाके आयोजनामे संचालन हुइल आठ दिने उद्यमशिलता विकास तालिम सोम्मारके रोज निम्जल बा ।
कैलारी गाउँपालिकाके अध्यक्ष राजसमझ चौधरीके वडका पहुनामे हुइल तालिम समापन कार्यक्रममे उहाँ गाउँपालिकासे स्थानीयस्तरमे रोजगारी सृजना कैना उद्देश्यसे तालिमके आयोजना करल बटैलै ।
उहाँ कहलै, ‘अब्बे ढेर जैसिन यूवा विदेश पलायन हुइटै, युवा शक्ति विदेश पलालन हुइल कारण यहाँके माटी बाँझ हुइना स्थिित बा । गाउँपालिकासे यूवाहुक्रे अपने गाउँठाउँमे आयमुलक काम करके पैसा आर्जन करिट कहटी उद्यम विकास तालिम डेहल हो ।’ रोजगारी नइपाके खाली बैठल यूवा अब्बे लागुऔषध दुव्र्यशनीमे फस्टी गैल फे अध्यक्ष राजसमझ बटैलै ।
सीप सिखलपाछे अपने गाउँघरमे खेर जैटी रहल उत्पादितसे प्रयोग करके आम्दानीके स्रोत बनाई सेक्नाफे उहाँ कहलै । ओस्टेक करके गाउँपालिका अध्यक्षसे कैलारी गाउँपालिका–७ हौसलपुरमे बाल शिक्षा कोटा स्थापना कैनाफे प्रतिवद्धताफे जनैले बटै ।
कार्यक्रममे विशिष्ट पहुना कैलारी गाउँपालिका–७ के अध्यक्ष तथा प्रवक्ता दिपेन्द्र बम ओ वडा नम्बर ५ के अध्यक्ष विष्णु चौधरी रहल रहिट । तालिम समापन कार्यक्रममे वडा नम्बर ७ वडा सदस्य सुन्दरी चौधरीलगायतके उपस्थिति रहे ।
सीप सिखी आत्मनिर्भर बनी कना मुल नाराके साथ हुइल गरिबी निवारणका लागि लघु उद्यम विकास कार्यक्रम (मेडा–पा) अन्र्तगत उद्यमशिलता विकास तालिम, व्यावसाय सचेतना तालिम, व्यावसाय सुरु ओ लैङिक सामाजिक समावेशीकरण तालिम डेहल रहे । उ तालिम वडा–७ स्थित बसन्तामे गैल अगहन २५ गतेसे सुरु हुइल रहे ।
ओस्टेक करके कैलारी गाउँपालिका–८ मे सोम्मारसे तीन दिने कृषि तालिम सुरु हुइल वडा अध्यक्ष तारामल कठरिया बटैलै । तालिम पुस ६ गतेसम संचालन हुइना उहाँ जनैलै ।
