मानवाधिकार समूह ओ स्थानीय सरोकारवालाहुकनके क्षमता अभिवृद्धि तालिम

पहुरा समाचारदाता
कञ्चनपुर, पुस ५ । इन्सेक सुदूरपश्चिम प्रदेश कार्यालय धनगढीके आयोजनामे बेलौरी नगरपालिकास्तरीय मानवाधिकार समूह ओ स्थानीय सरोकारवालाहुकनके दुई दिने क्षमता अभिवृद्धि तालिम मंगरके रोज बेलौरीमे हुइल बा ।

कार्यक्रममे नगरपालिका शिक्षा शाखा प्रमुख देवबहादुर चन्द पालिकासे निर्माण करले नीति तथा कार्यक्रम कार्यान्वयन हुइटि करल कटि प्रभावकारी कार्यान्वयनके लाग मानवाधिकार समूहसे सल्लाह सुझाव तथा सहकार्य करना आव्हान करलैं । मानवाधिकार समूहसे निश्चित ठाउँ ओ क्षेत्रके समस्या तथा सवालबारे पालिकाहे जानकारी कराके समाधान करना सजिलो हुइल उहाँ बटैलैं ।

इन्सेक सुदूरपश्चिम प्रदेश संयोजक खडकराज जोशी तालिमसे मानवाधिकार समूह ओ सेवाप्रदायक निकाय बीच शिक्षा, स्वास्थ्य, वातावरण ओ लैंगिक विभेद तथा जातीय छुवाछूतके सवाल पहिचान करना तथा समाधान करना सम्बन्धमे साझा बुझाई रहल ओरसे आगामी दिनमे ओइसिन सवाल समाधानके लाग सहज हुइना बटैलैं ।

तालिममे इन्सेकके सुदूरपश्चिम संयोजक जोशी मानवाधिकारके अवधारणा, आर्थिक, सामाजिक ओ सांस्कृतिक अधिकार तथा मानवाधिकार समूहके काम, कर्तव्य ओ अधिकार, बेलौरी नगरपालिकाके प्रमुख प्रशासकीय अधिकृत नरबहादुर बिक शिक्षा, स्वास्थ्य, वातावरण ओ लैंगिक विभेद विरुद्धके अधिकार सम्बन्धी पालिकाके नीति तथा कार्यक्रम ओ कार्यान्वयनके अवस्था ओ अधिवक्ता पुष्पबिक्रम शाही मानवाधिकार ओ सुशासन तथा स्थानीय न्यायिक समितिके काम, कर्तव्य ओ अधिकार, इन्सेक सुदूरपश्चिम प्रदेश कार्यालयके कार्यक्रम फोकल पर्सन राजकुमार चौधरी मागदावी ओ पैरवीके प्रक्रियाके विषयमे सहजीकरण करले रहैं ।

तालिममे मानवाधिकार समूहके पदाधिकारी ओ स्थानीय तहके शाखा प्रमुख तथा प्रतिनिधिहुकनके सहभागिता रहे ।