धनगढीमे प्याराडाइज रेस्टुरेन्ट एण्ड आर्ट म्यूजियम खुलल
पहुरा समाचारदाता
धनगढी, ६ पुस । धनगढी थ्रीडी आर्टसहितके सुविधा सम्पन्न प्याराडाइज रेस्टुरेन्ट एण्ड आर्ट म्यूजियम उद्घाटन हुइल बा । उपमहानगरपालिकाके उत्तरबेहडीमे उ आर्ट म्यूजियम सञ्चालनमे आइल हो ।
रिक्सा चलाके व्यवसाय सुरु करल सुवोधराई यादव अपन छावा सुनिल यादवहे उ व्यवसायमे पुगैले बटैं ।
दशक ढेर रिक्सा चलाके सुनिलके बाबा ओकरपाछे टेन्ट हाउसके व्यवसाय सुरु करले रहैं । “मोर बाबा रिक्सासे सुरु करल व्यवसायहे टेन्ट हुइटि अब्बे आके रेस्टुरेन्टसम पुगैना सफल हुइल बटैं,” सुनिल कलैं, “आज बाबाक आर्शिवादसे रेस्टुरेन्ट ओ धनगढी आर्ट म्यूजियम संचालनमे नन्ले बटु । और लगानी बह्रैना सोच बा ।”
उहाँ अब्बे करिब एक करोडके लगानीमे उ रेस्टुरेन्ट ओ धनगढी आर्ट म्यूजियम सञ्चालनमे नानल बटैलैं । म्यूजियमके काम अन्तिम चरणमे रहल ओ माघ पहिल हप्तासे सञ्चालनमे नन्ना यादव बटैलैं । सस्ता ओ मिठ खाना अवैना अपन पहिल प्राथमिकता रहना उहाँ बटैलैं ।
