प्रदेश सभा सदस्यहे पुस १५ गते सपथ

पहुरा समाचारदाता
धनगढी, ७ अगहन । सुदूरपश्चिमके नवनिर्वाचित प्रदेशसभा सदस्यहुक्रनहे शपथ कराइक लाग ज्योतिषीसँग साइत जुराके मिति तोकगैल बा ।

इहे पुस ११ गतेके लाग नवनिर्वाचित प्रदेशसभा सदस्यहुक्रनहे शपथ करैना मिति तय होके आवश्यक तयारी करल प्रदेशसभा सचिवालायसे उक्त दिन स्थगित कैके कुछ दिन पाछे करल हो । प्रदेश प्रमुख देवराज जोशीके परामर्शमे ज्योतिषीसे साइत जुराके पुस १५ गतेके लाग शपथ करैना दिन तय करल प्रदेशसभा सचिवालय जनैले बा । आब पुस १५ गते सुरुमे प्रदेश प्रमुख जोशीसे नवनिर्वाचित प्रदेश सांसद मानबहादुर रावलसे शपथ लेना बाटै । उहे दिन अन्य अन्य ५२ जाने प्रदेश सांसदहुक्रनहे रावलले शपथ करैना प्रदेशसभा सचिवालय जनैले बा ।

निर्वाचन आयोगसे प्रदेश प्रमुख देवराज जोशीहे प्रदेश सभा सदस्य निर्वाचनके मत परिणामसहितके प्रतिवेदन बुझाइलसँगे सुदूरपश्चिम प्रदेश सभा सचिवालयसे शपथ ग्रहणके तयारी सुरु करल हो । अब्बेसम १५ गते शपथ कराके १८ गते संसद् सुरु कैना विषयमे करिब सहमति होसेकल प्रदेश प्रमुख कार्यालयके स्रोत जनैले बा । यहोर प्रदेश सचिव देब बहादुर बोगटी फेन इ बिषयमे छलफल हुइल बटैलै ।

प्रदेश सभा सचिवालयके सूचना अधिकारी युवराज जैशीके अनुसार सबसे बरवार ज्येष्ठ प्रदेश सभा सदस्य अछामके मानबहादुर रावल रहल बाटै । उहाँ अछाम निर्वाचन क्षेत्र नं. २ (२) से निर्वाचित हुइल हुइट । ६८ वर्षीय रावल प्रदेश सभा सदस्यहे पद तथा गोपनीयताके शपथ ग्रहण करैना जैशी बटैलै । ओकरपाछे, रावलहे प्रदेश प्रमुख जोशी पद तथा गोपनीयताके शपथ ग्रहण करैना बाटै । सुदूरपश्चिम प्रदेश सभामे ६ राजनीतिक दल ओ एक स्वतन्त्र सदस्यके प्रतिनिधित्व रहल बा ।

५३ सदस्यीय प्रदेश सभामे १९ सदस्यसहित नेपाली कांग्रेस सबसे बरवार दल रहल बा । नेकपा माओवादी केन्द्रके ११, नेकपा एमालेके १०, नागरिक उन्मुक्तिके सात, एकिकृत समाजवादीके चार ओ राप्रपाके एक प्रदेश सभा सदस्य रहल बाटै । सुदूरपश्चिम प्रदेश सभामे एक जाने स्वतन्त्र प्रदेश सभा सदस्य रहल बाटै । सुदूरपश्चिम प्रदेश सभामे कौनो फेन दलके अकली बहुमत नैहुइल ओरसे प्रदेशमे गठबन्धन दलके संयुक्त सरकार बन्ना सम्भावना रहल बा ।