कठुवाके पौवा, धोती ओ कटौटी टोपीमे सांसद गंगाके शपथ
पहुरा समाचारदाता
धनगढी, ७ पुस । कैलालीके निर्वाचन क्षेत्र नं. ३ से निर्वाचित सांसद् गंगाराम चौधरी औरसेफे पृथक पहिरन लगाके सांसदके शपथ ग्रहण करले बटै । उहाँ थारु समुदायके मौलिक पहिरन लगाके शपथ ग्रहण करल हुइट ।
चौधरी उज्जर धोतीसहित गोरमे कठुवाके पौवा ओ मुरीमे कटौटी टोपी घल्ले रहिट । नागरिक उन्मुक्ति पार्टी पहिचानवादी पार्टी रहल ओरसे थारु समुदायके पहिचान झल्कैना अपने परम्परागत पहिरन लगाके शपथ ग्रहण करल उहाँक कहाई बा । अपने पृथक पहिरन लगाईबेर सक्कुहुनके ध्यान तानल कहटी उहाँ थप्लै, ‘सभा हलमे जैना क्रममे जब टोक्रयाक टोक्रयाक मोर पौवाके आवाज आइल । उ बेला सक्कु जाने महीहे केल हेरलै ।’ उहाँ अपने खेतुवामे लगाइल पप्लर प्रजातिके कठुवाके पौवा शपथ ग्रहणमे लगाइक लाग मिस्ट्रीहे बनवाई लगाइल रहिट । ओस्टेक करके, टोपीफे गाउँघरमे बनाके लगाइल बटैले बटै ।
नागरिक उन्मुक्ति पार्टीसे प्रतिनिधित्व करल सांसद चौधरीसहित रन्जिता श्रेष्ठ चौधरी, अरुण चौधरी ओ नागरिक उन्मुक्ति पार्टीके समर्थन पाके स्वतन्त्रसे विजयी सांसद लालवीर चौधरीसेफे मातृ भाषामे शपथ ग्रहण करले बटै ।
सांसद रञ्जिता श्रेष्ठ चौधरी मौलिक पहिरन लेहंगा ओ अरुण धोती लगैले रहिट ।
नवनिर्वाचित संसदसे शपथ ग्रहण
नवनिर्वाचित प्रतिनिधि सभा सदस्यहुक्रे आज पद तथा गोपनीयताके शपथ ग्रहण करले बटै । ओइनहे प्रतिनिधि सभाके ज्येष्ठ सदस्य पशुपति शमशेर जबरा शपथ खवैले रहिट ।
