राहदानीके निशुल्क अनलाइन फारम भर्न व्यवस्था
पहुरा समाचारदाता
धनगढी, २२ माघ । जिल्ला प्रशासन कार्यालय कैलालीसे राहदानीके निशुल्क अनलाइन फारम भर्न व्यवस्था सुरुवाट करले बा ।
प्रमुख जिल्ला अधिकारी युवराज कटेल विद्युतिय राहदानी बनाई अइना सेवाग्राहीहुकनके चाप तथा सुविधाहे मध्यनजर करके राहदानीके निशुल्क अनलाइन फारम भर्न व्यवस्था सुरुवाट करल बटैलै । राहदानीके अनलाईन फारम भरे मिल्ना करके यी महिनाके मसान्तसके लाग ३५० अनलाइन आवेदन फारम खोल्के सिस्टमेफे खुला करल उहाँ जनैलै ।
दैनिक ५० जाने सेवाग्राहीहे राहदानी फाराम भरे मिल्न करके बिफेसे हेल्प डेस्क स्थापना करल हो । जिल्लामे राहदानी लेहे आइल सेवाग्राहीसे भोगे परल समस्याहे मध्यनजर करटी कक्ष स्थापना करल सहायक प्रमुख जिल्ला अधिकारी यज्ञराज जोशी बटैलै ।
उहाँ बिफेसे कक्ष सञ्चालन हुइलेसेफे विभागके वेबसाइटमे समस्या आके लक्ष्य अनुसारके सेवाग्राहीहे सेवा उपलब्ध कराई नइसेक्ना बटैलै । उहाँ कहलै–‘डेस्कके लाग आवश्यक जनशक्ति, उपकरण उपलब्ध कराइल बा । अब विभागके वेबसाइटके समस्या समाधान हुइलेसे पूर्ण सेवा उपलब्ध करैना बा ।’
यी आघे राहदानी बनाई अइना सेवाग्राहीसे बाहेर फर्म भरके कार्यालयमे जाई पर्ना रहे । यिहीसे सेवाग्राही नीजि पसलमे महँगा शुल्क तिरे पर्ना बाध्यता रहे । कार्यालयभिटर फर्म भरे लागलपाछे सेवाग्राहीसे बाहेर तिरे पर्ना शुल्कसे राहत पैना उहाँ विश्वास रहल बा ।
