मोटरसाइल मर्मत ओ विद्युत वाइरिङ तालिम सम्पन्न

पहुरा समाचारदाता
हसुलिया, २४ माघ । कैलालीके कैलारी गाउँपालिकामे कैलाली एकिकृत उत्थान कार्य संजाल (किरण) नेपालसे संचालन करल ४५ दिने मोटरसाइल मर्मत ओ विद्युत वाइरिङ तालिम सम्पन्न हुइल बा ।

कैलारी गाउपालिकाके आर्थिक सहयोगमे क्षमता विकास तथा युवा स्वरोजगार कार्यक्रम अन्तर्गत निः शुल्क मोटरसाईकल मर्मत तथा विद्युत जडान तालिम पुस ६ गतसे सुरु हुइल रहे ।

तालिम समापन कार्यक्रमके वडका पहुना कैलारी गाउँपालिकाके अध्यक्ष राजसमझ चौधरी रहल रहिट । समापन कार्यक्रममे बोल्टी उहाँ बेरोजगार यूवाहुकनके स्थानीयस्तरमे रोजगारी सृजना करेक लाग गाउँपालिकासे तालिम संचालनके लाग सहयोग करल बटैलै ।

ढेर यूवा अपन गाउँठाउँ, घर खेतुवा छोरके विदेशमे जैना चलन बा’, गाउँपालिका अध्यक्ष राजसमझ कहलै, ‘करे सेक्लेसे यिहेफे टमान सम्भावना बा । भारतियहुक्रे नेपालके आके घर भवन बनैनासे लेके टिना खेती करके लाखौ कमाइटै । मने यहाँ टे अपन जग्गा बाँझ बनाके विदेश जाई अन्ना उत्पादनमे कमी आइटा ।’ गाउँपालिकासे यूवाके लाग सीप विकास उद्यम विकासके लाग तालिम संचालन करलफे अध्यक्ष बटैलै ।

कार्यक्रममे विशिष्ट पहुना कैलारी गाउँपालिका नेपाली कांग्रेसके सभापति कृष्ण प्रसाद चौधरी पहुनामे कैलाली गाउँपालिका प्रवक्ता तथा वडा नम्बर ७ के वडा अध्यक्ष दिपेन्द्रबहादुर बम, वडा नम्बर १ के वडा अध्यक्ष धोजहरिपाल बोहरा, वडा–५ के वडा विष्णु प्रसाद चौधरी, वडा नम्बर ४ के वडा अध्यक्ष ठागुराम चौधरी, वडा–८ के वडा अध्यक्ष तारामल कठरिया, वडा नम्बर ३ के वडा सदस्य किसन चौधरी, किरण नेपालके सस्थापक सल्लाहकार ध्रुव चन्द्र चौधरी, सल्लाहकार मनिराम बखरिया, सल्लाहकार हरिराम चौधरी लगायतके सहभागिता रहे ।

तालिम समापन कार्यक्रम किरण नेपालके अध्यक्ष अमृतचन्द्र चौधरीके अध्यक्षतामे हुइल रहे । कार्यक्रम सस्थाके सचिव मुकेश बखरिया संचालन करले रहिट कलेसे स्वागत मन्तव्य लोकेन्द्र बखरिया करले रहिट ।