सुदूरपश्चिम प्रदेशसभाके आजके बैठक स्थागित
पहुरा समाचारदाता
धनगढी, २५ माघ । सुदूरपश्चिम प्रदेशके प्रथम अधिवेशनके आजके हुइना कहल सातौं बैठक स्थागित हुइल बा ।
सभामुख माननीय भीम भण्डारीके आदेश अनुसार विशेष कारणवस आजके बैठक स्थागित करके बैठक काल्ह विफेक रोज २६ गते एक बजेके लाग तोकल प्रदेशसभा सचिव देवबहादुर बोगटी जनैलै । आज मुख्यमन्त्री राजेन्द्रबहादुर रावल विश्वासके मत लेहक लाग बैठक बोलाइल रहे । नागरिक उन्मुक्ति पार्टीसे टीकापुर घटनाके राजबन्दी रिहाईके साथे सक्कु मुद्दा फिर्ता नइहुइटसम मुख्यीमन्त्रीहे विश्वासके मत नइडेना अदान राखलपाछे विश्वासके मत नइडेखलपाछे आजके बैठक स्थागित हुइल हो ।
नागरिक उन्मुक्ती पार्टी सुदूरपश्चिम प्रदेश संसदीय दलके नेता रामेश्वर चौधरी पहुरा दैनिकसे बाटचित करटी न्यायके मुद्दा सुनुवाई नइकरटपाछे विश्वासके मत नइडेना बैठकमे सहभागीफे नइहुइना जनैले रहिट । टीकापुर घटनाके मुद्दा फिर्ता हुई पर्ना, रेशम चौधरी लगायतके कैदीबन्दी रिहा हुई पर्ना ओ लाल आयोगके प्रतिवेदन सार्वजनिक कैना नागरिक उन्मुक्ति पार्टीसे पहिलेसे माग रख्टी आइलद रहे ।
संविधानके धारा १६८ के उपधारा (२) बमोजिम दुई वा दुईसे ढेर दलके समर्थनमे बहुमत पुगाके नियुक्त हुइल मुख्यमन्त्रीसे एक महिनाभिटर विश्वासके मत लेहे पर्ना प्रावधान बा । मुख्यमन्त्रीसे माघ २६ गतेभिटरे प्रदेश सभासे विश्वासके मत लेसेके पर्ना बा ।
नागरिक उन्मुक्ति पार्टीसे विश्वासके मत नइडेलेसे मन्त्रिमण्डल विस्तार नइहुइटी सरकार विघटन हुइना अवस्था सृजना हुई । नेकपा (माओवादी केन्द्र), नेकपा (एमाले), नागरिक उन्मुक्ति पार्टी ओ राप्रपा मिलके प्रदेश सरकार गठन करल बा । सुदूरपश्चिम प्रदेश सभामे नागरिक उन्मुक्ति निर्णायक पार्टी हो । यी पार्टीके समर्थनबिना मुख्यमन्त्रीहे विश्वासके मत नइपुगी ।
उहाँहे २७ जानेक समर्थन आवश्यक बा । प्रदेशसभामे सत्तापक्षीय नेकपा एमालेके दश, माओवादी केन्द्रके सभामुखबाहेक दश, नागरिक उन्मुक्तिके सात ओ राप्रपाके एक सदस्य बटै । विपक्षमे रहल नेपाली कांग्रेसके १९, नेकपा (एकीकृत समाजवादी)के चार ओ एक स्वतन्त्र सदस्य रहल बटै ।
