एमाले नेतृत्वके सुदूरपश्चिम प्रदेश सरकार ढलगैल
पहुरा समाचारदाता
धनगढी, २६ माघ । एक महिनामे एमाले नेतृत्वके सुदूरपश्चिम प्रदेश सरकार ढलल् बावै । मुख्यमन्त्री राजेन्द्रसिंह रावल विश्वासके मत नैपाइलपाछे एमाले नेतृत्वके सुदूरपश्चिम प्रदेश सरकार ढलल् हो ।
बिफेक रोज बैठल प्रदेश सभा बैठकमे सम्बोधन कैटी मुख्यमन्त्री रावल विश्वासके मतके लाग प्रस्ताव करल रहिट । मने, विश्वासके मतके प्रस्ताव अस्वीकृत हुइल बा ।
टीकापुर घटनाके कैदीबन्दीहुक्रनहे रिहाइ करलपाछे किल मुख्यमन्त्रीहे विश्वासके मत डेना नागरिक उन्मुक्ति पार्टीके निर्णयपाछे सरकार ढलल् हो । टीकापुर घटनाके कैदीबन्दीहुक्रनहे रिहाइ करलपाछे किल मुख्यमन्त्रीहे विश्वासके मत डेना नागरिक उन्मुक्ति पाटीसे निर्णय करल रहे । उक्त पार्टीके ७ सांसद काठमाडौंमे रहल बाटै । आजके प्रदेश सभा बैठकमे उहाँहुक्रे सहभागी नैहुइलै ।
संविधानके धारा १६८ के उपधारा (२) बमोजिम पुस २७ गते रावल मुख्यमन्त्रीमे नियुक्त हुइल रहिट । मुख्यमन्त्री रावल बिफेक रोज विश्वासके मत लेहे पर्ना संवैधानिक बाध्यता रहे । संविधानके धारा १६८ के (२) अनुसार मुख्यमन्त्री बनल रावल ३० दिन भित्रे विश्वासके मत लेहे नैसेकलपाछे धारा (३) अनुसार बरवार दलके संसदीय दलके नेता मुख्यमन्त्री बन्ना संवैधानिक व्यवस्था रहल बा । इहे व्यवस्था अनुसार कांग्रेसके शाह भावी मुख्यमन्त्री बन्ना बाटै ।
