मुख्यमन्त्री शाह लेलै पद तथा गोपनीयताके सपथ
पहुरा समाचारदाता
धनगढी, २७ माघ । सुदूरपश्चिम प्रदेश सरकारके नव नियुक्त मुख्यमन्त्री कमल बहादुर शाह पद तथा गोप्यनियताके शपथ लेहल सँगे थप दुई जनहनहे मन्त्रीमे नियुक्त करले बाटै । इ सँगे सुदूरपश्चिम प्रदेशमे मुख्यमन्त्रीसहित ३ सदस्यीय मन्त्री मण्डल गठन हुइल बा ।
तीनु जाने आज पद तथा गोपनीयतके शपथ ग्रहण करले बाटै । मन्त्रीहुक्रनहे प्रदेश प्रमुख देवराज जोशी शपथ ग्रहण करल हुइट ।
नेपाली कांग्रेससे मन्त्री बनल प्रकाश देउवाहे भौतिक पूर्वाधार मन्त्रालयके जिम्मेवारी डेहल बा कलेसे एकीकृत समाजवादीसे मन्त्री बनल नरेशकुमार शाहीहे आर्थिक मामिला मन्त्रालयके जिम्मेवारी डेहल हो ।
कांग्रेस सभापति शेरबहादुर देउवाके भतिज्वा समेत रहल प्रकाश कैलाली क्षेत्र नं. ५ (२) से निर्वाचित हुइल हुइट कलेसे शाही बाजुरा निर्वाचन क्षेत्र १ से निर्वाचित हुइल हुइट ।
सुदूरपश्चिम प्रदेशके मुख्यमन्त्री राजेन्द्र रावल बहुमत गुमाइलसंगे काँग्रेस संसदीय दलके नेता शाह मुख्यमन्त्रीमे नियुक्त हुइल हुइट । बिफेक बैठल बैठकमे सत्ता साझेदार दल नागरिक उन्मुक्ति पार्टी अनुपस्थित हुइलपाछे रावल विश्वासके मत पाई नइसेकल रहिट ।
मुख्यमन्त्री रावलसे विश्वासके मत नइपाइलपाछे संविधानके धारा १६८ के उपधारा ३ अनुसार भारी दलके हिसाबसे कांग्रेस संसदीय दलके नेता कमल शाह मुख्यमन्त्री बनल हुइट ।
