राष्ट्रिय मावि उर्मीके ५०औँ बार्षिकोत्सव
पहुरा समाचारदाता
धनगढी,२८ माघ । कैलालीके धनगढी उपमहानगरपालिका वडा नं. १५ स्थित राष्ट्रिय माध्यमिक विद्यालय उर्मीके ५०औँ वार्षिकोत्सव सम्पन्न हुइल बा ।
विद्यालय व्यवस्थापन समितिके अध्यक्ष सुन्दरी कार्कीके सभापतित्वमे हुइल कार्यक्रममे वडका पहुना धनगढी उपमहानगरपालिकाके नगर उपप्रमुख कन्दकला राना रहल रहिट । कार्यक्रममे बोल्टी उहाँ धनगढी उपमहानगर पालिकासे शिक्षाहे अग्रणी स्थानमे धारल बटैली ।
नगरभिरके ७३ ठो सामुदायिक विद्यालयमे शिक्षाके गुणस्तर वृद्धि करैना, यकर लाग धनगढी उपमहानगरपालिकासे पञ्चवर्षिय कार्यक्रम बनाके लागु कैना उहाँ बटैली ।
कार्यक्रमके विशिष्ट पहुना धनगढी उपमहानगरपालिका वडा नं. १५ के वडा अध्यक्ष सुखदेव राना, शिक्षा, युवा तथा खेलकुद महाशाखा धनगढीके अधिकृत सुर्यबहादुर कार्की शुभकामना मन्तव्य व्यक्त करल रहिट । विद्यालयके प्र.अ. अमरसिंह तरामी मगर ८५ लाख बराबरके आय–ब्यय प्रस्तुत करल रहिट । कार्यक्रमके संचालन शिक्षक मोहनप्रसाद आचार्य ओ स्वागत मन्तव्य शिक्षक दिपकराज जोशी करले रहिट ।
