टोल कक्षा संचालनसे शिक्षा क्षेत्रमे सुधार हुइलः गाउँपालिका अध्यक्ष

पहुरा समाचारदाता
हसुलिया, २८ माघ । कैलारी गाउँपालिकाके अध्यक्ष राजसमझ चौधरी टोल कक्षा संचालन हुइलपाछे सामुदायिक विद्यालयके शिक्षा क्षेत्रमे सुधार हुइल बटैलै ।

युएस एडके आर्थिक सहयोगमे युनिसेफके समन्वयमे निडस नेपालसे कैलारी गाउँपालिकाके सामुदायिक विद्यालयमे लागु करल ‘शिक्षामे कोभिड प्रतिकार्य कार्यक्रमके समापन तथा गाउँपालिका स्तरीय समिक्षा बैठकमे वडका पहुना रहल गाउँपालिका अध्यक्ष उ बाट बटवाइल रहिट ।

कोभिड महामारी कारण लकडाउनसंगे विद्यालय बन्द हुके विद्यार्थीन सिकाईमे कमी नानल रहे’, गाउँपालिका अध्यक्ष कहलै, ‘निडस नेपालसे लागु करल शिक्षामे कोभिड प्रतिकार्य कार्यक्रम विद्यार्थी फेरसे सिखे पैना अवसर पैलै । टोल कक्षा संचालनसे विद्यार्थीनके सिकाईमे बुद्धि हुइल बा ।’

टमान सामाग्रीके माध्यमसे पह्राई सुरु हुइलपाछे सिकाईमेफे थप सहयोग मिलल गाउँपालिका अध्यक्ष बटैलै ।
सामुदायिक विद्यालयमे लउण्डीके ढेर ओ नीजि विद्यालयमे लउण्डाके संख्या ढेर रहल कहटी अभिभावकसे छावाछाईनहे भेदभाव हुइल विल्गाइठ, उहाँ कहलै । सामुदायिक विद्यालयमे विद्यार्थीनहे संख्या कम हुइटी गैल ओरसे शिक्षकहुक्रे अभिभावक मन जिटना आवश्यक रहल बटैलै ।

कार्यक्रममे निडस नेपालके कार्यकारी सदस्य अन्जु जोशी भट्ट कोभिडके बेला छुटल पह्राई पूर्ति करेक लाग करेक लाग कार्यक्रम लागु करल बटैली । निडस नेपालसे सुरु करल कार्यक्रम गाउँपालिकासे सहकार्य करके सफल बनाइलमे धन्यवादफे डेली ।

ओस्टेक करके निडस नेपालके अनुगमन अधिकृत दिपेन्द्र चौधरी निडस नेपालसे लागु कार्यक्रमके बारे जानकारी डेहल रहिट । परियोजनासे टोल शिक्षकहे तालिम, कक्षा इसिडीसे कक्षा ३ समके विद्यार्थीनहे सिकाई सामाग्री, कक्षा ४ से कक्षा ८ समके विद्यार्थीनहे मिना किताव वितरण, टोल शिक्षकहे पुनतर्जकी तालिम, टोल शिक्षकहुकनहे टयावलेट हस्तान्तरण, विद्यालय तथा गाउँपालिका स्तरीय आपतकालिन अवस्थामे सिकाई निरन्तरता योजना निर्माणके लाग तालिम, विद्यालयहे सिकाई निरन्तरताके लाग योजना निर्माणके लाग अनुदान डेहल उहाँ बटैलै ।

‘शिक्षामे कोभिड प्रतिकार्य कार्यक्रमके समापन तथा गाउँपालिका स्तरीय समिक्षा बैठकमे कैलारी गाउँपालिकाके प्रवक्ता तथा वडा नम्बर ७ के वडा अध्यक्ष दिपेन्द्रबहादुर बम, वडा नम्बर १ के वडा अध्यक्ष धोजहरिपाल बोहरा, वडा नम्बर ४ के वडा अध्यक्ष ठागुराम चौधरी, वडा नम्बर ३ के कार्यवाहक वडा अध्यक्ष किसानलाल चौधरी, निडस नेपालके फिल्ड सुपरभाइजर पुष्पराज उपाध्याय, टमान विद्यालयके प्रअ, कैलारी गाउँपालिकाके टमान शाखाके प्रमुख तथा कर्मचारीहुकनके सहभागिता रहे । कार्यक्रमके संचालन कैलारी गाउँपालिका सामाजिक विकास शाखा यगम कलेल करले रहिट । कैलारी गाउँपालिकाके ९ वडामे एक सय २२ ठो तोल कक्षा संचालन करल करल रहे ।