कैलारीमे खाद्य अधिकार संजाल पुनर्गठन

पहुरा समाचारदाता
हसुलिया, २८ माघ । याक नेपाल ओ फियान नेपालके संयुक्त आयोजनामे खाद्य अधिकार संजालके पदाधिकारीनहे क्षमता अभिवृद्धि ओ संजाल पुनर्गठन हुइल बा ।

कैलारी गाउँपालिकाके अध्यक्ष राजसमझ चौधरीके वडका पहुनामे शुकके रोज हसुलियाहे खाद्य अधिकार संजालके पदाधिकारीनहे क्षमता अभिवृद्धि ओ संजाल पुनर्गठन कार्यक्रम हुइल हो । कार्यक्रममे बोल्टी उहाँ गाउँपालिका बाढसे प्रभावित क्षेत्र रहल बटैलै । बाढके कारण यहाँके खेती योग्य जमिन कटान, पटान अन्नवाली नोक्सान हुके खाद्यन्नके कमी हुइना अवस्था आइल अध्यक्ष बटैलै । उहाँ कहलै, खाद्य अधिकार हनन् हुइल समुदायके खाद्य अधिकार सुनिश्चिताके बसन्ते मकै ओ चैते धानहे गाउँपालिका अशौसे विशेष ध्यान देले बा । चैत धान लगाइल गाउँपालिकासे दुई करोडके कार्यक्रम नानल कहटी चैते धान लगुइयाहे प्रतिकटठा ६ रुप्या अनुदानके व्यवस्था करल उहाँ बटैलै ।

प्रत्येक वडाहे पकेटके रुपमे आघे बह्राइल बा,’ उहाँ कहलै, ‘वडा नम्बर ७ मे एक ठाउँमे साढे सात विघामे थारु आलु लगाइल बा । यहाँ १५ विघामे आलु खेती करल बा । और वडामे औरे पकेट बनाके खेती हुइटी बा ।’ यी पालिकामे ढेर जैसिन सुकुम्बासी, दलित, मुक्तकमैया बस्ती रहल बा, ओइनके खाद्य अधिकार सुनिश्चित करेक लाग गाउँपालिका तत्पर रहल बटैलै ।

फियान नेपालके प्रदेश संयोजक मुकन्द राना आम नागरिक खाद्य अधिकार कलेक मौलिक अधिकारके भिटर पर्ना ओरसे खाद्य अधिकार सुनिश्चित करेक लाग तीन तहके सरकारके दायित्व रहल बटैलै । संघमे राष्ट्रिय खाद्य परिषद, प्रदेशमे प्रदेश खाद्य परिषद ओ स्थानीय तहमे स्थानीय समन्वय समिति गठन करके कार्यान्वयन करे पर्ना उहाँ बटैलै ।

खाद्य अधिकारके क्षेत्रमे अपनेफे सजक हुइना ओ औरहेफे सजक बनाइक लाग संजालके आवश्यक रहल उहाँ बटैलै । खाद्य अधिकारके बाट आइबेर कतिपय खाई नइपाके टे कतिपय ढेर खाके समस्यामे परल उहाँ बटैलै । भोकमरी कलेक खाई नइपैना केल नाही, ढेर खैनाफे हो उहाँ कहलै । उत्पादनमे ध्यान डेटी खानाहे खेर नइफेक्नाफे उहाँ आग्रह करलै ।

कार्यक्रमे नेपाल पत्रकार महासंघ कैलालीके सचिव प्रेम चौधरी, सहास नेपालके नरबहादुर जिरेल, गाउँपालिका स्तरीय खाद्य अधिकार संजालके संयोजकमे माया चौधरी लगायत मन्तव्य व्यक्त करल रहिट । कार्यक्रम याक नेपालके अध्यक्ष धनबहादुर रावलके अध्यक्षतामे हुइल कार्यक्रमके संचालन याक नेपालके सर्जुप्रसाद चौधरी करले रहिट ।

याक नेपाल, फियान नेपाल कैलारी गाउपालिकामे गाउँपालिका स्तरीय खाद्य अधिकार संजाल गठन करके आर्थिक सामाजिक रुपमे कमजोर रहल वर्ग समुदायहे राज्यके श्रोत प्राप्त करके जिविकोपार्जनमे सहज वातावरण सृजना करेक लाग सहजीकरण करटी आइल बा । दुनु संस्थाके उद्देश्य अक्के मेरिक रहल ओरसे संयूक्त रुपमे माया चौधरीके संयोजकत्वमे गाउँपालिका स्तरीय खाद्य अधिकार संजाल गठन करल बा । संजालके सह सहयोजकमे दिपक सुनार, सचिवमे मनोजकुमार चौधरी, सहसचिवमे कमल प्रसाद चौधरी रहल बटै ।

ओस्टेक करके सदस्यमे लक्ष्मी दहित, योगेन्द्र सुनार, पवित्रा विक, आशा चौधरी, पुष्पा चौधरी, सिता चौधरी, करविर सिंह धामी, चेरिया चौधरी, जय चौधरी, आशिष चौधरी, पदमसिंह कार्की, सरिता चौधरी ओ मानबहादुर चौधरी रहल बटै ।
संस्थासे सुदूरपश्चिम प्रदेशमे टमान कारणसे खाद्य अधिकार हनन् हुइल समुदायके खाद्य अधिकार सुनिश्चिताके लाग विविध क्रियाकलाप संचालन करटी बटै ।