शिव मन्दिरके शिलान्यास
पहुरा समाचारदाता
भजनी, ६ फागुन । भजनी नगरपालिका वडा नं. ३ ठेकीपुर पुलस्थित शिव मन्दिरके शिलान्यास करल बा ।
शिव मन्दिर निर्माण समितिके आयोजनामे भजनी नगरपालिकाके नगर प्रमुख केवल चौधरी मन्दिरके बैधिक विधि सहित शिलान्यास करल हुइट हो । नगर प्रमुख केवल चौधरी शिव मन्दिर निर्माण समितिहे यैसिन कार्य आघे बह्राइलमे धन्यावाद डेहल रहिट । उहाँ कहलै, ‘नगरसे करे पर्ना सहयोगमे हम्रे पाछे नइहटब यी कार्यसे सफलता मिले आस्था रखुइयाके लाग पुजा, आरधना कैना मन्दिर मजा बने परल ।’
उ वडाके अध्यक्ष तथा नगर प्रवक्ता विक्रम चौधरीसेफे अपने सेकटसम सहयोग करटी आइल ओ अभिनफे वडासे हुइना सहयोग कैना बटैलै । मन्दिर निर्माणसे भजनी क्षेत्रहे धार्मिक स्थल तथा पर्यटकीय दृष्टिकोणसे चिन्हैना सहजुल हुइल उहाँ बटैलै ।
कार्यक्रममे शिव मन्दिर निर्माण समितिके अध्यक्ष भरत साउद, टमान राजनितिक दलके प्रतिनिधि, समाजसेवी, पत्रकार, बड्घर ओ स्थानीय बासीके सहभागितामे उ मन्दिरके शिलान्यास कैगिल रहे ।
