चितुवाके छालासहित २ जाने पक्राउ

पहुरा समाचारदाता
धनगढी, ७ फागुन । कैलाली लम्की–चुहा नगरपालिका वडा नं. ०३ टुक्की बजारमे चितुवाके छालासहित दुई जाने पक्राउ परल बटै ।

सुदूरपश्चिनम प्रदेश प्रहरी कार्यालय धनगढी ओ ईलाका प्रहरी कार्यालय चिसापानीसे प्रहरी निरिक्षक टेकबहादुर जोराके कमाण्डमे खटके गैल संयुक्त प्रहरी टोली कुईनेसे चिसापानीओर मोटरसाइकलमे अइटी जिल्ला अछाम बिनायक नगरपालिका वडा नं. ०६ तोली बैठना बर्ष–३६ के तुलबहादुर बि.क ओ जिल्ला जुम्ला तातोपानी गाउँपालिका वडा न. ०४ राउत वडा बैठना बर्ष–५० के तुलबहादुर खत्रीहे अँटवारके रोज दिनके सावा दुई बजे पक्राउ करल हो ।

चालक तुलबहादुर बि.कसे चलाइल से.५ प ८०३१ नं. के मोटरसाईकल पाछे बैठल तुलबहादुर खत्रीके ठेन रहल लाल हरडयार रंगके जेब्रा झोला चेकजाँच करेबेर लम्बाई ७ फिट १० ईन्च ओ चौडाई ४ फिट ७ ईन्च रहल चितुवाके छाला थान १ (एक) ओ बन्यजन्तुके जैसिन विल्गैना टमान भागके हडडी २ किलो ९५० ग्राम ओ मोबाईल थान २ (दुई) बरामद करल जिल्ला प्रहरी कार्यालय कैलालीके सहायक प्रवक्ता खजेन्द्र साउँद बटैलै । दुनहुनहे मोटरसाइकलसहित पक्राउ करके जिल्ला प्रहरी कार्यालयमे धारके थप अनुसन्धान कार्य हुइटी रहल उहाँ जनैलै ।