शेयर सदस्यके पुँजी सुरक्षित बा

पहुरा समाचारदाता
धनगढी, ९ फागुन । बैंक तथा वित्तीय संस्थाके ज्यागदति विरुद्ध दैनिक समाचार आइलागलपाछे नवजीवन सहकारी संस्थामे शेयर सदस्यसे लगानी करल रुप्या सुरक्षित रहल बटैले बा ।

मंगरके रोज पत्रकार सम्मेलनके आयोजना करके सहकारीके आय ब्यय बारे जानकारी डेटी शेयर सदस्यस जमा करल रुप्या सुरक्षित रहल संस्थाके अध्यक्ष देवबहादुर बम बटैलै ।

२०७९ माघ मसान्तसम सहकारीके जम्मा कुल सम्पत्ति रकम ६ अर्ब ३४ करोड ४ लाख ९९ हजार रहल जनाइल बा । संस्थाके अनुसार शेयर पुँजी २७ करोड ७५ लाख २७ हजार, शेयर सदस्य संख्या ३१ हजार ५ सय ८९, जगेडा कोष ओ और कोष करके जम्मा ५८ करोड ३५ लाख २७ हजार रकम रहल बा ।

बचतओर निक्षेप ४ अर्ब ३० करोड ४४ लाख ४१ हजार, लगानीमे रहल रकम ३ अर्ब ८८ करोड ८३ लाख ९१ हजार रहल नवजिवन सहकारी संस्था सञ्चालक समिति अध्यक्ष बम जानकारी डेलै । ओस्टेक बाँकी ब्याज रकम १८ करोड ८३ लाख ६० हजार, कर्जा निक्षेप अनुपात ९० दशमलव ३३ प्रतिशत रहल उहाँ बटैलै ।

नगद तथा बैँक मौज्दात रकम ९२ करोड ६९ लाख ९६ हजार, तरलता प्रतिशत २१ दशमलव ५४ प्रतिशत तथा आम्दानी ३७ करोड ४४ लाख ३७ हजार रहल संस्थाके अध्यक्ष बम जानकारी डेलै ।

नवजीवन सहकारी संस्था लिमिटेडके खर्च ३३ करोड ३९ लाख ३६ हजार रहल बा । नाफा नोक्सान ४ करोड ५ लाख १ हजार हुइलमे स्थिर सम्पत्ति १५ करोड ५२ लाख ५३ हजार रकम रहल उहाँक कहाई बा । ओस्टेक नवजीवन सहकारी संस्था लिमिटेडसे लघुवित्त कार्यक्रम अन्तगरगत ७ सय १ सदस्य सख्या रहल बटै । १६ लाख ४८ हजार बचत रकम रहल बा । ४ करोड ४९ लाख ६० हजार रिण रहल बा कलेसे १ लाख ११ हजार मुनाफा हुइल संस्थाके अध्यक्ष बम जानकारी डेलै । कृषि उपज संकलन उपआयोजना अन्तरगत १ करोड २२ लाख ५ हजारके ४ हजार ८ सय २८ क्वीन्टल धान खरीद स्कट करल बटैलै । संस्थाके अध्यक्ष बम ३ कार्यकाल सञ्चालक समिपमे बैठल १२ बर्ष ओ १ बर्ष अध्यक्ष बैठल अवस्थासम संस्थामे आर्थिक कारोबारमे कुछ समस्या नइडेखल बटैलै । और सहकारी संस्थामे बाहेर सुनल जैसिन रिण ओ ब्याजदरमे कौनो तरलता ओ अभाव नइडेखल उहाँक कहाई बा ।

सहकारीके निवर्तमान अध्यक्ष चक्रबहादूर सिहं सहकारीसे सुरक्ष्ीित स्थानमे केल लगानी करल कारण अपन ग्राहक ओ शेयर सदस्यके निक्षेप सुरक्षीत रहल ओरसे ढुक्क रहन आग्रह करलै । सहकारीसंंग अब्बे नगद १ अर्व रुप्या रहल बटैटी अपन ग्राहक ओ शेयर सदस्यहुकनहे ढुक्कसँग कारोबार कैना उहाँ आग्रह करलै । धनगढीमे केन्द्रीय कार्यालय रहल नवजीवन सहकारी संस्था लिमिटेडके १० ठो सेवा केन्द्र टिकापुर, बासगढी बर्दिया, अत्तरीया, सुख्खड, जोशीपुर, आई बि आर डी, कञ्चनपुर, राजपुर, चौमाला ओ हसुलिया रहल बा ।