‘प्रविधिमैत्री शिक्षाके आवश्यकता’
पहुरा समाचारदाता
धनगढी, ११ फागुन । समाजके विकास, समृद्धि तथा प्रगतिओर लैजाइक लाग आबके प्रविधिमैत्री शिक्षाके आवश्यकता रहल एक कार्यक्रमके सहभागीहुक्रे बटैले बटैं ।
बुधके रोज धनगढीमे शिक्षाके लाग राष्ट्रिय अभियान (एनसीई) के आयोजनामे हुइल सुदूरपश्चिम प्रदेशस्तरीय ‘प्रदेशमे नयाँ सरकारः शिक्षाहे प्राथमिकता कत्रा ?’ कना विषयमे छलफल सहभागीहुक्रे ओइसिन अभिव्यक्त व्यक्त करले बटैं ।
कार्यक्रममे भौतिक पूर्वाधार विकासमन्त्री प्रकाशबहादुर देउवा शिक्षाहे प्रविधिमैत्री तथा सीपमूलक बनाइ सेक्लेसे जीवनोपयोगी हुइसेक्ना बटैले बटैं । उहाँ सुदूरपश्चिम प्रदेश सरकार गुणस्तरीय शिक्षा प्रदानके लाग सामुदायिक विद्यालयके सुधारके प्रतिवद्ध रहल बटैलैं ।
उहाँ कलैं, “सार्वजनिक शिक्षाहे कैसिन सुधार करना कहिके घनिभूतरूपमे छलफल कैना जरुरी बा । अइसिन छलफलकैलेसे प्रदेशके शिक्षामे सुधार हुइ सेकि ।”
सुदूरपश्चिम प्रदेश सभा सदस्य शिवसिंह ओली सरकारसे शिक्षामे आवश्यकता अनुसार बजेट नैरहल बटैलैं । उहाँ कलैं, “शिक्षामे सुधारके बलगर प्रतिवद्धता कैके योजना जरुरी बा, मने अब्बे अइसिन हुइ सेकल नैहो ।”
अस्टेक, पूर्वमन्त्री पूर्णा जोशी शिक्षाहे सुधारके लाग सक्कु सरकार आ–अपन क्षेत्रसे काम करलेसे फेन पर्याप्त मात्रामे नैरहल बटैलि । उहाँ नागरिक चेतना सुधार नैहुइटसम शिक्षामे सुधार हुइ नैसेक्ना बटैलि ।
उहाँ कलि, “विद्यालयमे गुणस्तरीय शिक्षा नैहुइल बेला अभिभावक जाके विद्यालयहे सचेत कराइ परनामे ओइसिन हुइ नैसेकल हो ।” “शिक्षाके अन्तिम स्वरूप फेन श्रम हो । शिक्षामे समान संवेदना सिर्जना करे सेकेपरठ ।”
कार्यक्रममे जोरायल गाउँपालिकाके उपाध्यक्ष जमुना बोहरा रोकाया चाहे जट्ना प्रविधिमैत्री शिक्षाके बाट करलेसे फेन दूरदराजमे सम्भव नैरहल बटैलि ।
उहाँ कलि, “हमार गाउँपालिकाके टमान ठाउँमे मोबाइलमे टावर नैरहठ । अइसिन ठाउँमे इन्टरनेट कैसिक प्रयोग करेसेकब ?” डोटीके आदर्श गाउँपालिकाके अध्यक्ष गणेशबहादुर खड्का विकासके मूलमन्त्र शिक्षा रहल ओरसे शिक्षाके ऐन, नियम, नीति, योजना समयानुकुल परिमार्जन करना आवश्यक रहल बटैलैं ।
अस्टेक, कार्यक्रममे गोदावरी नगरपालिकाके नगरप्रमुख वीरेन्द्र भट्ट अर्थतन्त्रमे सुधार नैहुइटसम शिक्षामे सुधार हुइ नैसेक्ना बटैलैं । उहाँ पालिकामे फेन सीमित स्रोतसाधन रना ओ संघसे फेन बजेट कम पठाइल ओरसे शिक्षा क्षेत्रमे लगानी करे नैसेकल बटैलैं ।
अस्टेक, एनसीईके सल्लाहकार प्रा.डा. विद्यानाथ कोइराला कार्यक्रमके सहजीकरण करटि प्रदेशके विकासके लाग रैथाने ज्ञान, सीप, प्रविधि प्रयोगमे नानेसेक्ना प्रदेश सरकार विश्वविद्यालय खोल्ना प्रयत्न करेपरना बटैलैं ।
उहाँ कलैं, “आबके आवश्यकता कलेक प्रविधिमैत्री शिक्षाके हो । अब्बेक शिक्षा कलेक विषयगत नैहो प्रविधिमैत्री शिक्षा हो ।” उहाँ गुणस्तरीय शिक्षा प्रदान करेक लाग शिक्षकहुकनहे समसामयिक तालिमके आवश्यकता रहल बटैलैं ।
“शिक्षकहुकनसेफे प्रविधि आघे बह्रसेकल बा, टबेमारे प्रविधिमैत्री शिक्षा आजके आवश्यकता हो,” उहाँ कलैं । कार्यक्रममे फाया नेपालके शेरबहादुर बस्नेत, गणेशबहादुर सिंहलगायत मन्तव्य व्यक्त करले रहैं । कार्यक्रम शिक्षाके लाग राष्ट्रिय अभियानके सुदूरपश्चिम संयोजक हेमराज जोशीके अध्यक्षतामे हुइल रहे ।
