धनगढीमे ६ लेन सडक जोगनार

पहुरा समाचारदाता
धनगढी, १० फागुन । धनगढी उपमहानगरपालिकाके छ लेन सडक खण्डमे बुधके साँझसे स्मार्ट लाइट बरल बा ।

सुदूरपश्चिम प्रदेशके भौतिक पूर्वाधार विकास मन्त्री प्रकाश देउवासे एक कार्यक्रमके विच स्मार्ट लाइटके उदघाटन करल रहिट । कार्यक्रममे बोल्टी उहाँ धनगढीके विकासके लाग नगरपालिकाके सहकार्य करटी आघे बह्रना उहाँ प्रतिवद्धता जनैलै ।
पहिल चरणमे नेपाल विद्युत् प्राधिकरणके ४० ओ धनगढी उपमहानगरपालिकाके ६० प्रतिशत लागत साझेदारीमे काम हुइल बा । पहिल चरण अन्तरगत धनगढी चौराहसे मोहनपुर (एयरपोर्ट गेट) सम स्मार्ट बत्ती जडान करल बा ।

यी चरणमे करिब ४३२ ठो बत्ती जडान कैना धनगढी उपमहानगरपालिका ओ नेपाल विद्युत् प्राधिकरणबीच लगानी साझेदारी रहल बा । जेकर कुल लागत २ करोड ६९ लाख ५८ हजार ४ सय १० रुप्या रहल बा । धनगढी उपमहानगरपालिकाके १ करोड ६१ लाख ७५ हजार ४६ रुप्या ओ नेपाल विद्युत प्राविधिकरणके १ करोड ७ लाख ८३ हजार ३ सय ६४ रुप्या रहल बा । स्मार्ट स्ट्रिट लाईट जडान ६.६ किलोमिटर सडकमे हुइल उपमहानगरपालिका जनैले बा ।

स्मार्ट स्ट्रिट लाईट जडान सडकके २८ मिटरके दुरीमे करल बा । २१२ पोलमे ४३२ ठो बत्ती जडान करल हो । ती बत्तीमे सकारे हुइलपाछे बुटना ओ रात हुइलपाछे अपनही बरना सेन्सर समेत जडान करल सूर्योदय ऊर्जा प्रालिके इन्जिनीयर रविन महतो जानकारी डेलै ।

दुसरा चरणमे धनगढी उपमहानगरपालिकासे अपने एकल लगानीमे ढेर प्रकाश डेना हाईमास्ट लाइट जडान कैना नगर प्रमुख गोपाल हमाल बटैलै । जेम्ने अन्तरगत १० ठो बत्ती १६ फिट ढेङग पोलमे जडान हुइना उहाँ जनैलै । जेकर लाग टेण्डर हुके निर्माणधिन अवस्थामे रहल उहाँ बटैलै । ६४ लाख ९९ हजार ७ सय ६० रुप्या कुल लागतमे बन्टी रहल उ लाइट यिहे फागुन मसान्तसम कार्य सम्पन्न कैना लक्ष्य लेहल बा ।

टिसरा चरणमे स्मार्ट स्ट्रेट लाइट मोहना–अत्तरीय छ लेन सडक खण्डके ट्राफिक चौराहासे भन्सारसम ओ उत्तर धनगढी उपमहानगरपालिकाके सिमानासम, बाँकी रहल करिब २ किलो मिटर क्षेत्रमे यी बत्ती जडान कैना नगर प्रमुख हमाल बटैलै । आठ मिटर स्टील टयूवलर ७६ ठो पोलमे १२० वाटके ५८ ठो बत्ती जडान करल बा । जेकर इस्टिमेट लागत ८६ लाख ४० हजार १ सय ९२ रुप्या १८ रहल बा । जौन नगरपालिकाके अपे लगानीमे हुइना बा ।

नगरप्रमुख हमाल धनगढी जोगनार बनैना कामके सुरुवाट हुइल ओरसे यी अभियान जारी रख्टी १९ वडामे लागु कैना बटैलै । बत्ती जडानपाछे रातके समयमे हुइना सडक दुर्घटना न्यूनीकरण हुइना आशा लेहल नगर उपप्रमुख कन्दकला राना बटैली । धनगढी ओजरार बनैनासंगे शिक्षा, स्वास्थ्यमे ध्यान डेना जरुरी रहल उहाँ बटैली । कार्यक्रममे संचालन कृपाराम उपाध्याय करले रहिट ।