योजना उपभोक्ता समितिके पदाधिकारीनहे अभिमुखीकरण

पहुरा समाचारदाता
हसुलिया, १५ फागुन । कैलारी गाउँपालिकाके आयोजनामे योजना उपभोक्ता समितिके पदाधिकारीनहे योजना कार्यान्वयन समिति एक दिने अभिमुखीकरण तालिम डेहल बा ।

वडा नम्बर २ संचालन हुइल तालिममे कैलारी गाउँपालिकाके सामाजिक विकास शाखा प्रमुख यगम कलेल, योजना शाखा प्रमुख सन्तोषकुमार चौधरी ओ असिस्टेन्ट सब इन्जिनियर रविशंकर चौधरी सहजीकरण करल रहिट । कार्यक्रममे उपभोक्ता समितिके काम कर्तव्य अधिकार, आवश्यक कागजात, करकट्टी, सार्वजनिक सुनुवाई, अनुगमन, बजेट विनियोजन प्रक्रिया, संचालनबारे जानकारी डेहल बा । ओस्टेक योजना उपभोक्ता समितिके पदाधिकारीनहे हाल हाली योजनाके काम कैना निर्देशनफे डेहल बा ।

वडा सदस्य आशिक चौधरीके अध्यक्षतामे हुइल कार्यक्रम समापन वडा सदस्य टीकाकुमारी चौधरी, वडा सचिव हिरादेवी ठकुल्ला, प्रधानमन्त्री रोजगार कार्यक्रमके सह संयोजक इन्द्रश्याम चौधरीलगायतके उपस्थिति रहल रहे । योजना उपभोक्ता समितिके पदाधिकारीनहे अभिुमुखीकरण नौ वडाके आठ ठाउँमे कैना जनागिल बा ।