धनगढीमे सूचना प्रविधि मेला

पहुरा समाचारदाता
धनगढी, १६ फागुन । कैलालीके धनगढीमे क्यान इन्फोटेक एवम् सूचना प्रविधि मेला मंगरसे सुरु हुइल बा । कम्प्युटर एसोशिएसन अफ नेपाल (क्यान) कैलालीके आयोजनामे सूचना प्रविधि मेला सुरु हुइल हो । मेलाके सुदूरपश्चिम प्रदेशके प्रमुख देवराज जोशी उद्घाटन करल रहिट ।

उ क्रममे उहाँ सूचना प्रविधि मेलासे राष्ट्र निर्माण ओ समाज सेवाके क्षेत्रमे महत्वपूर्ण योगदान पुगैना विश्वास व्यक्त करलै । ‘जमाना अनुसारके टेक्नोलोजीके विकास हुइ परल’, उहाँ कहलै,‘इ मेलासे ज्या उद्देश्य लेले बा, उ पूरा होए कना मै कामना करटुँ ।’ सूचना प्रविधि मेलासे युवापुस्तासहित सर्वसाधारण सक्कु लाभान्वित हुइना प्रदेश प्रमुख जोशीके कहाइ रहे । उहाँ मेलाके सफलताके कामना करल रहिट ।

ओस्टके, उद्घाटन समारोहमे सुदूरपश्चिम प्रदेशके आर्थिक मामिला तथा योजनामन्त्री नरेशकुमार शाही सुदूरपश्चिमहे टेक्नोलोजीके हब बनाइ सेकजैना विषयमे प्रदेश सरकार अध्ययन करे खोजल बटैलै ।

लावा–लावा प्रविधिके बारेम जानकारी डेना उद्देश्यसे क्यान कैलालीसे सूचना प्रविधि मेला आयोजना करल हो । मेलामे सूचना प्रविधि, कम्प्युटर, इन्टरनेट लगायतसँग सम्बन्धित ७२ ठो स्टल रहल क्यान कैलालीके अध्यक्ष यज्ञराज ओझा जानकारी डेलै । ‘व्यापार, व्यवसाय प्रवद्र्धन फेन इ मेलाके उद्देश्य हो’, उहाँ कहलै,‘यहाँ आके सर्वसाधारण लावा लावा सूचना प्रविधिके बारेम जानकारी पाइ सेकही ।’

मेला अवधिभर कम्प्युटर, ल्यापटप लगायतके सामग्री अफरसहित छुटमे बिक्री हुइना आयोजक जानकारी डेले बा । फागुन २० गतेसम मेला आयोजना हुइना बा ।