मानव अधिकार समुहसे गाउंपालिकाके ध्यानआकर्षण
पहुरा समाचारदाता
कञ्चनपुर, १७ फागुन । लालझाडी गाउँपालिका स्तरीय मानव अधिकार समुहसे गाउँपालिका क्षेत्रमे रहल समस्या तथा सवाल समाधानके लाग गाउँपालिकाके ध्यान आकर्षण करैले बा ।
मंगरके लालझाडी गाउंपालिकाके प्रबक्ता तथा सामाजिक विकास समिति सभापति आशाराम राना मार्फत लालझाडी गाउँपालिकाके अध्यक्ष निर्मल रानाहे ध्यानआकर्षण पत्र बुझाके पालिकाके ध्यानआकर्षण करल मानवअधिकार समुहके संयोजक सोमनाथ राना बटैलै । ध्यानआकर्षण पत्रमे सामुदायिक विद्यालयके गुणस्तर खस्कटी जैना, विद्यालयमे छात्रामैत्री शौचालय नइहुइना, विद्यार्थीहुकनके अनुपातमे शिक्षक तथा विषयगत शिक्षकके अभाव रहल, अभिभावकहुकनके विद्यालय तथा वालबालिकाप्रति जिम्मेवारी बोध नइहुइल डेखल बा ।
विद्यालय परिसर तथा विद्यालय भिटरे शुर्ति जन्य, मदिराजन्य पदार्थ बिक्री वितरण हुइटी रहल, स्वास्थ्य संस्थामे नेपाल सरकारसे निशुल्क वितरण कैना औषधीके अभाव हुइना करल, उपलब्ध करैना औषधी तथा सेवाके बारेमे सर्वसाधारणके जानकारीके लाग सूचना बोर्डके उपलब्धता नइहुइल, सुत्केरी महिलाहुक्रे प्राप्त कैना डगरखर्च बाफतके रकम, पोषिलो खाना ओ न्यानो झोला समयमे उपलब्ध नइहुइल कहल बा ।
सार्वजनिक स्थानमे खासे जातिय छुवाछुत नइरहलेसेफे ग्रामीण क्षेत्रमे व्याप्त छुवाछुतहे न्यूनिकरण कैना जनचेतना जगैना आवश्यक रहल, छावाहे संस्थागत ओ छाई सामुदायिक बिद्यालयमे पढैना करल डेखल बा । समान कामके लाग समान ज्याला कार्यान्वय हुई नइसेकल, बस्तीहुकन बिचमे रहल ईटा उद्योग, खाद्य उद्योगसे मानव स्वास्थ्यमे नकरात्मक प्रभाव परटी रहल बा । जंगली जनावरके आक्रमण दिन प्रतिदिन बह्रटी रहल लगायतके समस्या तथा सवाल ध्यानाकर्षण पत्रमे उल्लेख करल बा ।
लालझाडी गाउंपालिका स्तरीय मानव अधिकार समुहका संयोजक रानासे ध्यानआकर्षण पत्र बुझैटी अपनेहुक्रे पहिचान करल समस्या समाधान करेक लाग लालझाडी गाउँपालिकाके प्रवक्ता आशाराम राना मार्फत पालिका अध्यक्ष निर्मल रानाहे आग्रह करलै । उहाँ पालिकामे बुझाइल ध्यानआकर्षणपत्रके त्रैमासिक रुपमे फलोअप कैना बटैलै ।
