जिल्ला स्तरीय राष्ट्रपति रनिङ शिल्डके विजेतामे धनगढी उपमहानगरपालिका
पहुरा समाचारदाता
धनगढी, १८ फागुन । १३ औं कैलाली जिल्लास्तरीय राष्ट्रपति रनिङ शिल्ड प्रतियोगिता धनगढीमे सम्पन्न हुइल बा ।
जिल्ला खेलकुद विकास समितिके आयोजनामे हुइल प्रतियोगिता धनगढी रंगशालामे सम्पन्न हुइल हो । कैलाली जिल्लाके १३ स्थानीय तहके झण्डै एक हजार ढेर खेलाडीहुकनके सहभागिता रहल प्रतियोगितामे धनगढी उपमहानगरपालिका पहिल हुइल बा ।
धनगढीसे १६ स्वर्ण, ५ रजत ओ ५ कास्य सहित २६ पदक जिटले बा । घोडाघोडी नगरपालिका दुरा हुइल बा । घोडाघोडीसे १६ स्वर्ण ४ रजत ओ ११ कास्य पदक सहित ३१ पदक जिटले बा । प्रतियोगितामे गोदावरी नगरपालिका टिसरा हुइल । गोदावरीसे ८ स्वर्ण ८ रजत ओ १० कास्य सहित २६ पदक जिटल । प्रतियोगितामे सहभागी टीकापुर नगरपालिकासे ५ स्वर्ण ७ रजत ६ कास्य सहित १८ पदक जिटेबेर लम्की चुहा नगरपालिकासे दुई स्वर्ण ४ रजत ओ ७ कास्य सहित ९ पटक जिटले बा । जानकी गाउँपालिकासे एक स्वर्ण ४ रजत ओ ७ कास्य सहित १२ पदक जिटले बा ।
प्रतियोगितामे सहभागी गौरीगंगा, मोहन्याल, चुरे, कैलारी, बर्दगोरिया, भजनी ओ जोशीपुर भर स्वर्ण पदक जिटे नइसेक्लै । भजनी ओ जोशीपुरसे रजत पदकफे जिटे नइसेकल कैलाली जिल्ला खेलकुद विकास समिति जनैले बा ।
प्रतियोगितामे भलिवल, कवड्डी, एथ्लेटिक्स, कराँते, उसु ओ तेक्वान्दो खेल समावेश करल रहे । प्रतियोगिताके उत्कृष्ट खेलाडी सुदुरपश्चिम प्रदेश स्तरीय राष्ट्रपति रनिङ शिल्ड प्रतियोगितामे भाग लिही । प्रतियोगिताके विजेता, उपविजेता ओ टिसरा हुइल पालिकाहे एक समारोहके बीच पुरस्कार वितरण करल बा ।
कैलाली जिल्ला खेलकुद विकास समितिके अध्यक्ष ललित खत्रीके अध्यक्षतामे हुइल समापन कार्यक्रमके वडका पहुना प्रदेशसभा सदस्य जानकीदेवी कुँवर रहिट ।
