धनगढीके बैंकमे तालाबन्दी

पहुरा समाचारदाता
धनगढी, १८ फागुन । कैलालीके उद्योगी व्यवसायी धनगढीके बैंक शाखामे तालाबन्दी कैटी ‘नो डिपोजिट’ मे उत्रल बाटै ।

बैंकके चर्को ब्याजके कारण मर्कामे परल कहटी आन्दोलित उद्योगी व्यवासायी धनगढीमे विरोध प्रदर्शनसहित बैंकके शाखामे तालाबन्दी कैटी ‘नो डिपोजिट’ करल हुइट । बैंकके शाखामे तालाबन्दी हुइलपाछे पैसा भुक्तान, जम्मा, ब्याज बुझैना लगायतके कार्य प्रभावित हुइल बावै ।

उद्योगी व्यवसायीहुक्रे व्यवसायीउपरके आतंक बन्द करो, बैंकके ब्याजदरमे एकरूपता कायम करो लगायतके नारा लगैटी आन्दोलनके कार्यक्रम कैटी आइल बाटै ।

कैलाली उद्योग वाणिज्य संघके उपाध्यक्ष पुष्कर ओझा व्यवसायीहुक्रे मर्कामे परके आन्दोलित हुइलेसे फेन राष्ट्र बैंक ब्याजदर घटैना ओर मौन बैठल बटैलै ।