गाउँपालिका स्तरीय मानव अधिकार समुहके बैठक
पहुरा समाचारदाता
धनगढी, १९ फागुन । लालझाडी गाउँपालिकास्तरीय मानव अधिकार समुहके बैठक बिफेक शंकरपुरमे सम्पन्न हुइल बा ।
लालझाडी गाउँपालिकास्तरीय मानव अधिकार समुहके संयोजक सोमनाथ रानाके अध्यक्षतामे सम्पन्न हुइल बैठकमे मानवअधिकार समुहके पदाधिकारी, सदस्य तथा इन्सेककर्मी लगाएत १३ जानेक सहभागीता रहल रहे ।
बैठकमे लालझाडी गाउँपालिकास्तरीय मानवअधिकार समुहहे नगरपालिकामे विधिवत रुपमे दर्ता कराइक लाग तयार पारल मानवअधिकार समुहके बिधान २०७९ उप्पर छलफल करके विधान संसोधन सहित पारित करल बा । मानवअधिकार समुहहे गाउँपालिकामे दर्ता करेक लाग समुहके संयोजक सोमनाथ राना, सचिव धुर्वराज राना ओ सदस्य राजमती रानाहे जिम्मेवारी तोक्न निर्णय बैठकसे करले बा ।
अनौपचारिक क्षेत्र सेवा केन्द्र (इन्सेक) सुदुरपश्चिम प्रदेश कार्यालय, धनगढीसे लालझाडी गाउँपालिकामे संचालित स्थानीय समुदायहे सचेत परटी जिम्मेवार निकायहे जवाफदेही बनैना कार्यक्रम अन्तरगत गठित मानवअधिकार समुहहे इन्सेकके परियोजना सेकल पश्चातफे समुहहे जिवन्त रख्न उदेश्यके साथ मानवअधिकार समुहहे विधिवत रुपमे दर्ता करे लागल इन्सेककर्मी कैलाश पनेरु बटैलै ।
लालझाडी गाउँपालिकासे हालसमफे स्थानीय संघ संस्था दर्ता तथा नियमन ऐन निर्माण नइकरल कारण स्थानीयस्तरमे दर्ता हुके काम करे चाहन संघ संस्था दर्ता हुई नइसेकल ओरसे स्थानीय संघ संस्था दर्ता तथा नियमन ऐन यथाशिग्र निर्माण करके लागु कैना गाउँपालिकाहे आग्रह कैना निर्णय करले बा ।
साथे बैठकसे मानवअधिकार समुहके उपाध्यक्ष भानुमती राना सरकारी सेवा प्रवेश करल समुहमे बैठके काम करे नइसेकना जानकारी डेहल ओरसे उपाध्यक्षमे डम्बरी महताहे ओ सचिवमे सदस्य धुर्वराज राजाहे मनोनयन कैना निर्णय समेत करले बा ।
