आरके थारु एण्ड संघाती डसिया सांस्कृतिक प्रस्तुती हुइना

पहुरा समाचारदाता
धनगढी, २४ कुवाँर । संस्कृतिके झन्कारसंगे मानव सेवा ओ परोपकार रसुवा बाढपीडितके सहयोगार्थके लाग धनगढीमे कुवाँर ३१ गते आरके थारु एण्ड संघाती डसिया सांस्कृतिक प्रस्तुती हुइना बा । मिटुस घोङगी स्टेशन प्रालिके आयोजनामे थारू कला, संस्कृति, भाषा, संगीत तथा स्थानीय प्रतिभाके प्रवद्र्धन कैना उद्देश्यसहित ओम प्यालेस, नयाबजार, धनगढी, कैलालीमे पहिल कार्यक्रमके आयोजना करे लागल शनिच्चरके रोज पत्रकारके सम्मेलनके आयोजना करके जानकारी डेहल हो ।
डसियाके उल्लासहे संगीत, संस्कृति ओ सामाजिक सेवासंग जोरना उद्देश्यसे सुदूरपश्चिम ओ लुम्बिनी प्रदेशके टमान समुदायहे लक्षित करके उ सांस्कृतिक कार्यक्रम आयोजना करेलागल आर थारु पत्रकार सम्मेलनमे जानकारी डेलै ।
कार्यक्रम अन्तर्गत पहिल प्रस्तुति २०८३ कुवाँर ३१ गते कैलालीके धनगढीस्थित ओम प्यालेस ओ दुसरा प्रस्तुति २०८३ कार्तिक २ गते बर्दियाके राजापुरस्थित डायमण्ड होटल एण्ड पार्टी प्यालेसमे आयोजना हुइना उहाँ जनैलै ।
कार्यक्रममे लोकप्रिय थारु गायक तथा गीतकार आरके थारु संघाती ब्याण्डके विशेष सांगीतिक प्रस्तुति रना बा । साथे गायिका तथा मोडल अञ्जु कुश्मी (फूलकुमारी), लक्ष्मी राना, समीक्षा चौधरी, मोडल मधु चौधरी तथा होस्ट एवं गायक अनुप मगर लगायत कलाकारहुकनके सहभागिता रना बा । कार्यक्रममे लाइभ कन्सर्ट, सांस्कृतिक नृत्य, स्थानीय कलाकारहुकनके प्रस्तुति तथा डान्स मनोरञ्जनसमेत समावेश कैना आयोजक जनैले बा ।
मिटुस घोङगी स्टेशन प्रालिसे थारू समुदायके मौलिक पहिचान, परम्परा, खानपान, भेषभूषा, कला ओ संगीतहे नयाँ पुस्तामाझ परिचित करैटी सांस्कृतिक पर्यटन तथा स्थानीय प्रतिभाके विकासमे योगदान पुगैना लक्ष्य राखल बा ।
यी अभियानके निरन्तरताके रुपमे आयोजना हुई लागल स्थानीय कलाकारहे व्यावसायिक मञ्च प्रदान कैनाके साथे युवा पुस्ताहे अपन संस्कृति ओ पहिचानसँग जोरना विश्वास आयोजक लेले बा ।
आयोजकसे सांस्कृतिक उत्सवहे मनोरञ्जनमे केल्ह सीमित नैराखके सामाजिक उत्तरदायित्वसंग जोरना उद्देश्य राखल राजाराम चौधरी जानकारी डेलै । रसुवाके बाढपीडितहे सहयोग कैना अभियानहे प्राथमिकतामे रख्टी मानवीय सहयोग, सामाजिक एकता ओ परोपकारी भावनाके प्रवर्धन कैना लक्ष्यसमेत कार्यक्रमसे लेले बा ।
कार्यक्रममार्फत स्थानीय व्यवसाय, राष्ट्रिय ब्रान्ड, संघसंस्था तथा सामाजिक अभियन्ताहुकनहे सहकार्यके लाग आमन्त्रण करल बा । आयोजकके अनुसार सांस्कृतिक कार्यक्रमसे स्थानीय अर्थतन्त्र, पर्यटन, कलाकारके व्यावसायिक अवसर ओ समुदायबीचके सम्बन्धहे थप सुदृढ बनैना सहयोग पुगैना बा ।
कार्यक्रममे मुख्य आकर्षण आरके थारुके संघातीके प्रस्तुती, थारु सांस्कृतिक नृत्य सखिया, होरी, मुङग्रहवा, झुम्रा हुइना बा ।
बसेरा हस्पिलिटीके संचालक प्रदीप चौधरी डसियाहे थारु समुदायके संस्कृतिमय बनाइक लाग आयोजना हुइना मजा बाट रहल बटैलै ।
आरके थारू ओ साङ्घातीके आयोजनामे हुइना कार्यक्रमके लाग २५० रुप्या टिकट दर निर्धारण करल बा । धनगढीके ओम प्यालेसमे हुइना कार्यक्रमके टिकटसे उठल रकमके १० प्रतिशत रकम रसुवा बाढी प्रभावितहे हस्तान्तरण कैना व्यवस्थापक चौधरी जानकारी डेलै । कार्यक्रमके हस्पिटालिटी पार्टनरमे होटल बसेरा ओ माछा घर रहल बा ।