११औँ थारू साहित्य राष्ट्रिय सम्मेलन चितवनके माडीमे हुइना

पहुरा समाचारदाता
धनगढी, २४ कुवाँर । ११औँ थारू साहित्य राष्ट्रिय सम्मेलन अइना पुस १० ओ ११ गते चितवनके माडी नगरपालिका–३, बघौडास्थित कभर्ड हलमे आयोजना हुइना बा ।
थारू लेखक संघ नेपाल केन्द्रीय समितिके आयोजनामे हुइना सम्मेलनमे टमान संस्थाके सहकार्य रना संघके चितवन शाखाकृे अध्यक्ष सीएम अपिल चितौने बटैलै । जेम्नृे माडी नगरपालिका, माडी प्रज्ञा प्रतिष्ठान, नेपाल प्रज्ञा प्रतिष्ठान, थारू कल्याणकारिणी सभा (थाकस) चितवन, थारू पत्रकार संघ चितवन, थारू कलाकार संघ चितवन लगायतके सहकार्य रना बा ।
सम्मेलन तयारीके लाग भर्खर थारू लेखक संघ नेपालके संस्थापक पूर्वअध्यक्ष तथा संरक्षक एवम् नेपाल प्रज्ञा प्रतिष्ठानके प्राज्ञ परिषद् सदस्य डा कृष्णराज सर्वहारीके संयोजकत्वमे माडीस्थित थाकस क्षेत्र नं १ के सभा भवनमे बैठक सम्पन्न हुइल बा । उ बैठकसे सम्मेलनहे व्यवस्थित ओ प्रभावकारी रूपमे सम्पन्न कैना टमान उपसमिति गठन तथा जिम्मेवारी बाँडफाँट करले बा ।
बैठकसे स्मारिका प्रकाशन समिति तथा कार्यक्रम ओ आर्थिक उपसमितिके संयोजकमे चन्द्रमणि महतो, भोजन व्यवस्थापन उपसमितिके संयोजकमे हिरामति गुरौ, आवास व्यवस्थापन उपसमितिके संयोजकमे लिलकुमार महतो ओ प्रचार–प्रसार उपसमितिके संयोजकमे थारू पत्रकार संघ चितवनके अध्यक्ष मनोज अज्ञात थारूहे जिम्मेवारी डेहल बा । बाँकी उपसमितिफे हाली गठन कैना बा ।
सम्मेलनके तयारीके क्रममे माडी प्रज्ञा प्रतिष्ठानके पदाधिकारीसंग भेटघाट तथा छलफलसमेत करल बा । सम्मेलनके अवसरमे गैल वर्षहस यी वर्षफे थारु राष्ट्रिय कविता प्रतियोगिता कैनाके साथे दर्जन ढेर पुस्तक, पत्रिका विमोचन कैना टिमके इभेन्ट म्यानेजर डा सञ्जय महतो बटैलै । उहाँ प्यानल छलफलके लाग थारू भाषा, साहित्य, कला, संस्कृति ओ इतिहासके विविध विषयमे विज्ञके नामावली हाली टुंगो लग्ना जानकारी डेलै ।
छिमेकी मुलुक भारत बिहार क्षेत्रके थारू लेखक तथा थारु समुदायबारे नम्मा समयसे अध्ययन करटी रहल अन्य देशके स्कलरहे समेत सम्मेलनमे सहभागी करैना योजना रहल आयोजक जनैले बा ।
बैठकमे थाकस चितवनके अध्यक्ष ललितकुमार चौधरी, थाकस क्षेत्र नं १ माडीके पदाधिकारी, माडी नगरपालिका–३ के वडाध्यक्ष पुरन महतो लगायतसे ११औँ थारू साहित्य राष्ट्रिय सम्मेलन चितवनके माडीमे हुइना निर्णयसे अपनेहुकनके खुशी लागल बटैलै । साथे, तन, मन, धनसृे साथ डेना प्रतिवद्दता व्यक्त करलै ।
स्मरण रहे्, गैल वर्ष २०८२ माघ १६ ओ १७ गते पर्साके सुगौली पटेर्वा गाउँपालिका–२, बेलवामे १०औँ राष्ट्रिय सम्मेलन सम्पन्न हुइल रहे ।