शिक्षा, खेलकुद ओ सामाजिक सेवामे जोड डेहेपर्नामे जोड

पहुरा समाचारदाता
धनगढी, २४ कुवाँर । चैतन्य स्पोट्र्स एकेडेमीके आयोजनामे धनगढी उपमहानगरपालिका–५, शिवनगरस्थित फुटसल मैदानमे ‘चैतन्य अन्तरविद्यालय शिक्षक फुटसल प्रतियोगिता’ सुरु हुइल बा ।
प्रतियोगिताके उदघाटन करटी धनगढी उपमहानगरपालिकाके उपप्रमुख कन्दकला राना खेलकुदसे आपसी भाइचारा, सद्भाव ओ सहकार्य बह्रैना बटैली । उहाँ चैतन्य पाठशालासे शिक्षा, खेलकुद तथा सामाजिक सेवाके क्षेत्रमे करटी आइल कामके प्रशंसा करटी अइना दिनमेफे यैसिन गतिविधिमा उपमहानगरपालिकाके साथ रना बटैली ।
चैतन्य पाठशालाके बोर्ड अफ डाइरेक्टर कटकबहादुर सिंह शिक्षासंगे खेलकुदहे जोरके दक्ष खेलाडी, कलाकार तथा टमान क्षेत्रमे सक्षम जनशक्ति उत्पादन कैना पाठशालाके मुख्य उद्देश्य रहल बटैलै । उहाँ विद्यार्थीहे कक्षाकोठाके पढाइमे केल्ह सीमित नैधारके खेलकुद ओ अन्य सिर्जनात्मक गतिविधिमे समेत आघे बह्राईपर्नामे जोड डेलै ।
कार्यक्रमके विशिष्ट अतिथि कैलाली बहुमुखी क्याम्पसके प्रमुख डा. लोकबहादुर विष्ट चैतन्य पाठशालासे विगतसे शिक्षासंगे खेलकुद ओ सामाजिक सेवाके गतिविधिहे आघे बह्रैटी आइल कहटी प्रशंसा करलै । उहाँ समाजसँग जोरके कैना यैसिन कार्यक्रमसे सकारात्मक योगदान पुगैना उल्लेख करटी आयोजकहे आगामी दिनके लाग शुभकामना डेलै ।
चैतन्य पाठशालाके पीटीए अध्यक्ष ईश्वर गिरीके अध्यक्षतामे सम्पन्न उद्घाटन कार्यक्रममे शिक्षक, शिक्षिका, विद्यार्थी, अभिभावक, पत्रकार तथा सुरक्षाकर्मीलगायतके उल्लेखनीय उपस्थिति रहल रहे ।
प्रतियोगितामे २० टोली सहभागी हुइल बटै कलेसे कुल २१ खेल हुइना आयोजक जनैले बा । कुवाँर २४ ओ २५ गते सञ्चालन हुइना प्रतियोगिताके उद्देश्य शिक्षकबीच आपसी सद्भाव, सहकार्य ओ खेलभावना अभिवृद्धि कैना रहल आयोजक जानकारी डेले बा ।