बझाङमे जिप दुर्घटना, दुई जानेके मृत्यु
पहुरा समाचारदाता
बझाङ, १८ कार्तिक । बझाङके केदारस्युँ गाउँपालिका–७ भामचौरलग्गे जिप दुर्घटना हुके दुई जानेके घटनास्थलमे मृत्यु हुइल बा मने १३ जाने घाहिल हुइल बटै ।
दुर्घटनामे मृत्यु हुइनामे केदारस्युँ गाउँपालिका–७ काँडाचौरके गोपाल धामी ओ पवित्रा धामी रहल बटै । दुनु जानेके घटनास्थलमे मृत्यु हुइल स्थानीय दलबहादुर धामी जानकारी डेहल बटै । दुर्घटनामे छ जाने गम्भीर घाहिल हुइल बटै मने अन्य सात जानेके अवस्था सामान्य रहल बटैल बा ।
स्थानीयके अनुसार सुदूरपश्चिम प्रदेश ००१ प ४३७६ नम्बरके जिप बुधके बिहान ९ः१० बजे दुर्घटनामे परल हो । करिब १५ जाने स्थानीय बासिन्दाहे लैके काँडाचौरसे बागथलाओर आइटी करल जिप डाँडाइजर सुडेधार खोलालग्गे सडकसे करिब २० मिटर तल गिरल बटैल बा ।
जिल्ला प्रहरी कार्यालयके प्रहरी निरीक्षक उपेन्द्र तिमिल्सैनाके अनुसार अस्थायी प्रहरी पोस्ट बिजगडासे प्रहरी सहायक निरीक्षक मीन चन्दके कमाण्डमे दुई जाने, अस्थायी प्रहरी पोस्ट बागथलासे प्रहरी सहायक निरीक्षक केशवसिंह भण्डारीके कमाण्डमे दुई जाने ओ जिल्ला प्रहरी कार्यालयसे सात जाने प्रहरी घटनास्थलओर खटल बटै ।
जिपके चालक बुङ्गल नगरपालिका–२ गिरौँके मोहन धामी रहल बटैल बा । उ जिप केदारस्युँ गाउँपालिका–७ के वडाध्यक्ष चन्द्र धामीके रहलके स्थानीयसे जनैले बटै । घटनाबारे थप विवरण आइना बाँकी रहल बा ।
