थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ०६ अगहन २६५०, अत्वार ]
[ वि.सं ६ मंसिर २०८३, आईतवार ]
[ 22 Nov 2026, Sunday ]

धनगढीके १६ ठाउँमे ग्रासरुट फुटबल विकास कार्यक्रम उद्घाटन

पहुरा | ६ मंसिर २०८३, आईतवार
धनगढीके १६ ठाउँमे ग्रासरुट फुटबल विकास कार्यक्रम उद्घाटन

पहुरा समाचारदाता
धनगढी,६ अगहन । धनगढी उपमहानगरपालिकासे नगरके १६ ठाउँमे ग्रासरुट लेभल फुटबल विकास कार्यक्रम सञ्चालन कैना बा ।

सामुदायिक विद्यालय तथा सार्वजनिक खेल मैदानमे फुटबलके आधारभूत विकास कैना उद्देश्यसहित सञ्चालन करे लागल कार्यक्रमके शनिच्चर धनगढी रंगशालामे उद्घाटन करल बा ।

कार्यक्रमके उद्घाटन सुदूरपश्चिम प्रदेशके मुख्यमन्त्री खगराज भट्ट करले बटै । उद्घाटन कार्यक्रममे नगरप्रमुख गोपाल हमाल, नगर उपप्रमुख, कार्यपालिका सदस्यलगायतके उपस्थिति रहल रहे । कार्यक्रममे सहभागी खेलाडीहुक्रे कार्यक्रमहे खेल उत्सवके रूपमे लेले रहिट । मुख्यमन्त्री कार्यक्रमके उद्घाटन प्रशिक्षक तथा खेलाडीहे फुटबल डेहे करल रहे ।

धनगढी उपमहानगरपालिका ओ कैलाली जिल्ला फुटबल संघबीच हुइल सम्झौताअनुसार नगरके टमान वडामे रहल सामुदायिक विद्यालय तथा सार्वजनिक खेल मैदानमे कार्यक्रम सञ्चालन कैना बा । सम्झौतापत्रमे नगरप्रमुख गोपाल हमाल ओ कैलाली जिल्ला फुटबल संघके अध्यक्ष अनिल मल्ल हस्ताक्षर करले रहिट ।

कार्यक्रमअन्तर्गत वडा नम्बर १ के कभर्डहल खेल मैदान, वडा नम्बर २ के सूक्ष्म वर्गीकरण लग्गेक खेल मैदान, वडा नम्बर ३ के प्रस्तावित नयाँ बसपार्क खेल मैदान, वडा नम्बर ५ के यातायात लग्गेक श्रीकृष्ण खेल मैदान ओ वडा नम्बर ६ के धनगढी पोलिटेक्निक खेल मैदानमे प्रशिक्षण सञ्चालन हुइना बा ।

ओस्टेक, वडा नम्बर ७ के पटेला खेल मैदान, वडा नम्बर ८ के धनगढी नमुना माध्यमिक विद्यालय, वडा नम्बर ११ के दक्षिणकाली आधारभूत विद्यालय, वडा नम्बर १२ के मनकामना युवा क्लब, वडा नम्बर १३ के जनता राष्ट्रिय माध्यमिक विद्यालय ओ नवज्योति आधारभूत विद्यालय लग्गेक खेल मैदानमेफे कार्यक्रम सञ्चालन कैना बा । ओस्टेक करके वडा नम्बर १४ के टाउन प्लानिङ खेल मैदान, वडा नम्बर १७ के पथरी पुल लग्गेक मैदान ओ डुमौलिया खेल मैदान, वडा नम्बर १८ के प्रस्तावित स्टेडियम तथा वडा नम्बर १९ के आइ गाउँके खेल मैदानहे कार्यक्रममे समेटल बा ।

धनगढी उपमहानगरपालिकासे विगतसे ग्रासरुट खेलकुद विकासहे प्राथमिकता डेटी आइल बा । उपमहानगरपालिकासे आर्थिक वर्ष २०७९÷८० मे ग्रासरुट क्रिकेट कार्यक्रम सञ्चालन करल रहे । आर्थिक वर्ष २०८०÷८१ मेचार स्थान ओ २०८१÷८२ मेफे चार स्थानमे ग्रासरुट फुटबल कार्यक्रम सञ्चालन करल रहे । ओस्टे, आर्थिक वर्ष २०८२÷८३ मे १२ स्थानमे कार्यक्रम विस्तार करल रहे ।

उपमहानगरपालिकासे नगरके टमान स्थानमे खाली रहल सार्वजनिक जग्गाके उपयोग करटी हालसम २१ स्थानमे खेल मैदान निर्माण करल जनैले बा ।
स्थानीय स्तरमे फुटबल खेलके जग बल्गर बनैना, बालबालिका तथा युवाहे प्रारम्भिक चरणसे प्रशिक्षणके अवसर प्रदान कैना ओ विद्यालय तथा सार्वजनिक खेल मैदानहे खेलकुद गतिविधिके केन्द्र बनैना कार्यक्रमके मुख्य उद्देश्य रहल बा ।

जनाअवजको टिप्पणीहरू