सरकारसे लकडाउन थप्ना तयारी
काठमाडौं, ४ जेठ । अँट्वारके आज प्रधानमन्त्री निवास बालुवाटारमे साँझ ५ बजे मन्त्रिपरिषद् बैठक बैठ्ना जनाइल बा । बैठकसे लकडाउनहे निरन्तरता डेना तयारी करल बा ।
शनिच्चरके कोरोना संक्रमणसे एक सुत्केरी महिलाके मृत्यु हुइलपाछे ओ संक्रमितके संख्या बह्रटी गैलपाछे लकडाउनहे निरन्तरता डेना तयारी करल हो । बैठकमे सीमानाकामे आउर कडाइ करजैना तथा प्रभावित क्षेत्रके आधारमे लकडाउनहे आउर प्रभावकारी बनैना विषयमे छलफल हुइना एक मन्त्री जानकारी डेलै ।
भारतमे लकडाउन खुकुलो बनाइलमे सीमानामे नेपाली आके अलपत्र परल सन्दर्भमे उक्त विषयमे फेन आवश्यक निर्णय हुइ सेक्ना जनाइल बा । संक्रमणके रोकथाम तथा नियन्त्रणके लाग आवश्यक पर्ना स्वास्थ्य सामग्री समेत आसेकल परिप्रेक्षमे प्रवासमे रहल नेपालीहे फेन लन्ना विषय छलफलके एजेण्डा हुइ सेक्ना बटाइल बा ।
सरकारसे कोरोना भाइरस (कोभिड १९) रोकथाम तथा नियन्त्रणके लाग गत चैत्र ११ गतेसे लकडाउन करले बा ।
