धनगढीमे स्वाव संकलन केन्द्र स्थापना

धनगढी, १६ कुवाँर । कोरोना भाइरस कोभिड–१९ के स्वाव संकलनके लाग धनगढी उपमहानगरपालिकाके स्वाव संकलन केन्द्र स्थापना करल बा ।

नेपाल रेडक्रस सोसाईटी कैलाली जिल्ला शाखासे जर्मन राजदुतावासके सहयोगमे धनगढी उपमहानगरपालिका परिसरमे स्थापना करल स्वाव संकलन केन्द्रके शुकके नगर प्रमुख नृपबहादुर वड ओ सुदूरपश्चिम प्रदेश स्वास्थ्य निर्देशनालयके निर्देशक डाक्टर गुणराज अवस्थी उद्घाटन करल हुइट ।

नगरप्रमुख वड स्वाव संकलनके लाग यी केन्द्रसे राहत पुग्न बटैलै । ‘अब्बे कन्ट्रयाक्ट ट्रेसि·के आधारमे समुदायमे क्याम्प धारके स्वाव संकलन करटी रहल बाटी,’ नगरप्रमुख वड कहलै, ‘स्वाव संकलन केन्द्रसेफे स्वाव संकलन कैजाई ।’ नगरप्रमुख वड, शुकसम धनगढी उपमहानगरपालिकासे ४ हजार हाराहारीके पिसिआर परीक्षण करल बटैलै ।

सुदूरपश्चिम प्रदेश स्वास्थ्य निर्देशनालयके निर्देशक डाक्टर गुणराज अवस्थी धनगढी उपमहानगरपालिकासे कोरोना रोकथान, परीक्षणमा नमूना काम करटी रहल बटैलै । धनगढी उपमहानगरपालिकाके प्रमुख प्रशासकीय अधिकृत जगन्नाथ पन्त संकलन केन्द्रमे स्वाव संकलन करेबेर स्वाव डेना ओ संकलन कैना दुनुहहे सहजुल हुइना बटैलै । नेपाल रेडक्रस सोसाईटी कैलाली शाखाके सभापति उत्तम जोशी कोरोना रोकथाम ओ व्यवस्थापनके क्षेत्रमे जर्मन राजदुतावासके सहयोग ओ धनगढी उप–महानगरपालिकाके सहयोगमे उल्लेख्य काम हुइल बटैलै ।