क्वारेनटाइनके खर्च विवरण सार्वजनिक

पहुरा समाचारदाता
लम्की, ७ सावन । कैलालीके लम्कीचुहा नगरपालिका वडा न १ से क्वारेन्टाईन व्यवस्थापन खर्च सम्बन्धके सार्वजनिक सुनुवाई कार्यक्रम सम्पन्न करले बा ।

कोरोना भाइरसके संक्रमण रोकथाम तथा नियन्त्रण लाग सञ्चालन करल क्वारेन्टाईनके व्यवस्थापनमे हुइल खर्च विवरण सहित वडासे बुधके सार्वजनिक सुनुवाई करल हो । वडा भिट्टरके टमान विद्यालयमे सञ्चालन करल ६ ठो क्वारेन्टाईन व्यवस्थापनमे ७३ लाख ८६ हजार ३ सय १८ रुपैयाँ खर्च हुइल वडासचिव बिष्णुकान्त प्याकुरेल जानकारी डेलै । तीन महिना १३ दिनमे टमान क्वारेन्टाईनके ९ सय ८८ जनहनहे व्यस्थापनमे उ रकम खर्च हुइल वडा कार्यालय जनैले बा ।

सरस्वती मा.वि भुरुवा, बालकल्याण मा.वि भुरुवा, शहिद स्मृति मा.वि पुर्वलम्की ओ लम्की बहुमुखी क्याम्पस लम्की कैके ४ विद्यालयके क्वारेन्टाईनमे क्वारेन्टाईन सञ्चालन करल रहे ।

जेम्ने खानामे ४४ लाख ८ हजार ३ सय ९५ रुपैया, सेनिटाईजर, माक्स, ग्लबस लगायतके सक्कु औषधी १ लाख ४५ हजार ६ सय १५, कार्पेट, कपडा, पि फम, कम्मल, तन्ना, झुल, सिरानी, त्रिपाल, डस्नामे ७ लाख १२ हजार ३९ रुपैया, मिनरल पानी, मोटरमर्मत, पानी बत्तीके बिलमे २ लाख ५२ हजार १० रुपैया, स्टेशनरी सामाग्री ७० हजार ३१० रुपैयाँ, एम्बुलेन्स, अटो ओ ट्याक्टर भाडाके ५ हजार ४ सय ३ सय तीस रुपैयाँ, कपडा धोइल, माईकिङ्ग करल ७ हजार रुपैयाँ, पेट्रोल तथा ईन्धनमा ४१ हजार ६ सय २० रुपैयाँ, भाडाकुडा, ड्रम डेग, बाल्टिन क्यान, थाली, डस्टविन लगायतके सम्पुर्ण भाडाकुडीमे १ लाख २६ हजार ५ सय ५ रुपैयाँ, पंखा खरिद, पाईप खरिद, मर्मत जडान,वाईरीङ्ग वाईफाई समेत ४ लाख ५२ हजार खर्च हुइल जनाइल बा ।

ओस्टके स्वयंसेवक तथा स्वास्थ्यकर्मी पाना बि.क पोजेटिभ डेखगैलमे गाउँ सिल करेबर खटाइल स्वयमसेवक भत्ता समेतमे ८ लाख ८९ हजार ४ सय ९८ रुपैयाँ, पलाई खाट ३४ हजार ९ सय ९६ रुपैयाँ टमान क्वारेन्टाइनमे खटल समिति तथा उप सिमितिहे भत्ता १ लाख ९२ हजार रुपैयाँ कैके जम्मा ७३ लाख ८६ हजार ३ सयि १८ रुपैयाँ खर्च हुइल जनाइल बा ।

यहोर लम्कीचुहा वडा नं १ के कार्यालयसे आयोजना करल सार्वजनिक सुनुवाई कार्यक्रमहे नेपाली कांग्रेस वडा कमिति बहिष्कार करले बा । कांग्रेससे वडा कार्यालयसे कुन विद्यालयमे कत्रा रकम खर्च हुइल, कोरोना संक्रमितके नाउँमे सार्वजनिक करल, खर्च विवरण अपुर्ण ओ सत्य नाइ रहल कहटी सार्वजनिक सुनुवाईहे बहिष्कार करल यर्थात विवरण सहित पुन: सार्वजनिक सुनुवाई कैना समेत माग करले बा ।