६ हजार घर डुबानमे, ३ जाने वेपत्ता (फाेटु फिचर)
पहुरा समाचारदाता
धनगढी, १४ सावन । लग्टारे परल पानीसे आइल बाढके कारण कैलाली जिल्लामे करिब ६ हजारसे ढिउर घर डुबानमे परल बा । कलेसे ३ जाने बाढमे पुहके वेपत्ता हुइल बाटै ।
भजनी नगरपालिका ८ सोनाफाँटा क्षेत्रमे बुधके रोज ३ जाने बाढमे पुहके वेपत्ता हुइल बाटै । जिल्ला प्रशासन कार्यालय कैलालीके अनुसार भजनी नगरपालिका ८ सोनाफाँटाके ठग्गु चौधरीके ११ बरसके नतिया स्केल चौधरी, ओहे ठाउँके ईश्वरी शाही ओ चक्र बिक फेला नैपरल हुइट ।
३ जहनभर सकुसल उद्धार करल जिल्ला प्रशासन कार्यालय कैलालीके सूचना अधिकारी शिवराज जोशी जानकारी डेलै । सोनाफाँटाके हेमन्त शाही, बलबहादुर चौधरी ओ बिक्की शाहीहे भर उद्धार करल उहाँ बटैलै ।
ओस्टके जिल्ला प्रशासन कार्यालय कैलालीके साँझ्या पौने ६ बजेके तथ्यांक अनुसार कैलालीमे ६ हजार १५० से ढिउर घर डुबानमे परल बा । भजनी नगरपालिकामे १ हजार ८४० घर, जोशीपुर गाउँपालिकामे २ हजार ३१५ घर, जानकी गाउँपालिकामे १ हजार, टीकापुर नगरपालिकामे करिब १ हजार घर डुबानमे परल जनागिल बा ।
भजनी नगरपालिकाके प्रभावितहुकन लग्गेक विद्यालय, उच ठाउँ हुलाकी राजमार्गमे सारगिल बा । मने हुलाकी राजमार्गसो ३ फिट उप्पर पानी बहटी रहल जनागिल बा । मने हालसम प्रभावकारी ढंगसे उद्धारके काम नैहुइल भजनी नगरपालिका ३ कन्हैयापुरके आरती चौधरी बटैली । आपन मोटरसाइकल समेत बाढमे पुहल बटैटी उहाँ प्रभावित क्षेत्रमे उद्धार टोली नैपुगल बटैली ।
विस्थापित हुइल बाढ प्रभावितहुकनके लाग खानेपानी, खानाके समस्या बिल्गाइल बा । उहाँहुक्रे हुलाकी राजमार्ग सहित उच ठाउँमे त्रिपाल टाँड्डके बैठ्ना बाध्य हुइल बा ।
कैलाली जिल्लाके खासकैके मोहना, कन्द्रा, काँढा, पथरैया, कर्णाली लडियामे आइल बाढसेसे डुबान हुइल बा । मने पछिल्का समय उ लडियामे बाढके बहाब क्रमिक रुपमे घट्टी गैल जिल्ला प्रशासन कार्यालय कैलाली जनैले बा ।
यहेबीच जल तथा मौसम विज्ञान विभागके अनुसार देशभर मनसुनी वायुके प्रभाव रहलओरसे सुदूरपश्चिमके अधिकाशं क्षेत्रमे पानी पर्ना सम्भावना रहल बा ।
यहाँके लडियामे जौन बेलामे फेन पानीके बहाब बह्रे सेक्ना, पहाडी क्षेत्रमे भूक्षय हुइना, पहिरो जैना, सडक तथा हवाई यातायात प्रभावित हुइना तथा ढल ओ पानीके मजा निकास नैहुइल ठाउँमे डुबान समेत हुइ सेक्ना हुुइलओरसे उच्च सातर्कता अप्नाइक लाग उ विभाग आग्रह कर्ले बा ।
सम्बन्धित समाचार
कैलालीमे डेढ सय घर डुबानमे (भिडियाेसहित)
कैलालीके टमान ठाउँमे बाह्र (फाेटु फिचर ओ भिडियाे)
