कान्तिपुरकर्मी गणेश चौधरी उप्पर संघातिक हमला

पहुरा समाचारदाता
धनगढी, २७ सावन । कैलालीके टीकापुरसे कान्तिपुर दैनिक पत्रिकामे कार्यरत पत्रकार गणेश चौधरी उप्पर संघातिक आक्रमण हुइल बा ।

सावन २६ गते साँझ्याके कैलालीके जानकी गाउँपालिका ६ जगतपुर कना ठाउँसे रिपोटिंग करके घर लाैट्ना क्रममे आक्रमण हुइल हो ।

उहाँ कहलै–‘साँझ्या करिव ८ बजेओहार घर लाैटटही, एकफाले आक्रमण हुइल । ओकरपाछे स्थानीय भरत शाहके घरमे जाके ज्यान बचैली । मै टे हेलमेट लगाइलओरसे बचगिनु मने मोर संग रहल भोजराज चौधरीके कपारमे चोट लागल बा । उहाँक् कपारमे तीन टाँका लागल बा । मोर फेन अनुहारमे चोट लागल बा ।‘ उहाँ डुनु जाने नेपालगञ्जमे उपचारपाछे घर लाैटल बाटै ।

उहाँके अनुसार उहाँहुकन उप्पर जगतपुरके ललित कडायत, दिनेश शाह, सिरिष शाह, सुरेन्द्र शाही ओ जेनिश शाहीके समूहसे एकफाले आक्रमण हुइल जनागिल बा । घटनामे संलग्न रहल उ ५ जहन विरुद्ध ज्यान मार्न उद्योग अन्तरगत ईलाका प्रहरी कार्यालय टीकापुरमे मुद्दा दर्ता करटी रहल पत्रकार चौधरी जानकारी डेलै ।

यहेबीच नेपाल पत्रकार महासंघ कैलाली, थारू पत्रकार संघ नेपाल ओ नेपाल आदिवासी जनजाति पत्रकार महासंघ कैलाली उ घटनाप्रति गम्भीर ध्यानाकर्षण हुइल जनैले बा । घटनाप्रति घोर भत्र्सना करटी उ आपराधिक समूहहे कानून बमोजिम कडा कारवाहीके लाग सम्बन्धित निकायसे जोडदार माग समेत कर्ले बा ।