१८ दिनसे एक बालिका बेपत्ता
पहुरा समाचारदाता
धनगढी, २८ सावन । कञ्चनपुरमे १८ दिनसे एक बालिका बेपत्ता हुइल बाटी । जिल्लाके पुर्नवास नगरपालिका वडा ९ के १५ वर्षीया लक्ष्मी मगर बेपत्ता हुइल कहटी खोजीके लाग निवेदन आइल प्रहरी जनैले बा ।
इलाका प्रहरी कार्यालय पुर्नवासके प्रहरी निरीक्षक वकिल बहादुर सिंह परिवारसे साउन १० गते बेपत्ता हुइल खोजीके लाग आग्रह करल बटैलै । उहाँ बालिकाके हुलिया तयार कैके उप्पर निकायसम फेन पुगाइल बटैलै । बालिका बेपत्ता हुइल विषयमे थप अनुसन्धान हुइटी रहल उहाँ बटैलै ।
साउन १० गते साँझ घरसे निक्रल लक्ष्मी एकाएक सम्पर्क विहीन हुइल पारिवारिक श्रोत जनैले बा । लक्ष्मीके दादा बीर बहादुर मगर साउन १० गते सामान्य पारिवारिक विवाद हुइल बटैलै । उहे क्रममे उहाँ साँझ ५ बजे पसलसम जाइटु कहिके घरसे निक्रल रही ।
मने रातसम फेन घर नाइ आके लग्गेक नाटपाट, संघरियनसे सोधपुछ करेबर कौनो जानकारी नाइ आइल उहाँ बटैलै ।‘रिसाके गैल रही आजैही सोच्ली’ उहाँ कहलै,–‘१४ गतेसम अपने किल खोज्टी रहली ।’
मने कौनो सिप नाइ लागलपाछे साउन १४ गते प्रहरी चौकी खड्कखण्कडमे खोजीके लाग निवेदन डेहल उहाँ बटैलै ।‘प्रहरीसे कौनो जानकारी आइल नाइहो, खोजी हुइटी रहल जानकारी किल पैले बाटी ।’ उहाँ कहलै ।
लक्ष्मी राष्ट्रिय माध्यामिक विद्यालयमे कक्षा ८ के छात्रा हुइटी । घरसे निक्रल लक्ष्मी सम्पर्कमे नाइ आके परिवारमे तनावके वातावरण श्रृजना हइल बा ।
