छाडा गोरुनमे रिफलेक्टिभ स्टिकर
पहुरा समाचारदाता
धनगढी, ३० सावन । सवारी दुर्घटनामे कमी नानेक लाग कैलालीके अत्तरीया क्षेत्रमे रहल छाडा गोरुनमे घेँचामे रिफलेक्टिभ स्टिकर लगैना सुरु करल बा ।
रातको समयमे गोरुन बीच सडकमे सुटटी रहना ओ जोरसे आइल सवारी अनियन्त्रित हुके दुर्घटना हुइना करल ओरसे दुरसे चम्कना स्टिकर लगाई सुरु करल मालाखेती इलाका प्रहरी कार्यालय अत्तरीयाके प्रमुख प्रहरी नायब उपरीक्षक ज्ञानबहादुर बिष्ट बटैलै ।
रातके समयमे छाडा पशु चौपायासे हुइना दुर्घटनामे रिफलेटिभ स्टिकरसे कुछ सहज करी कहिके यी अभियान चलाइल शिवम् अटो व्हील्सके सञ्चालक कमल ओझा बटैलै । गौरक्षा तथा मानवीय क्षति न्यूनीकरण होए कना उद्देश्यसे छाडा पशु चौपायाके घेँचामे चम्कना रिफलेटिभ स्टिकर लगैना अभियान सञ्चालन करल सामाजिक अभियान्ता भरत बिक्रम शाह कहलै ।
सुदूरपश्चिम प्रदेशके कैलाली ओ कञ्चनपुरमे छाडा गोरुनके विषय बार–बार उठ्न करल बा । खेतबाली नष्ट करलठेनसे सवारी दुर्घटना निम्त्यइलसमके दुखेसो अइना करल ओरसे छोट सुरुवाट हुइलेसेफे अत्तरीयाके शिवम् अटो व्हील्सके सञ्चालक कमल ओझाके आर्थिक सहयोगमे प्रहरी ओ स्थानीय युवाहुकनके सक्रियतामे रिफलेटिभ स्टिकर लगैना कार्य शुकसे शुरुवाट करल प्रहरी नायब उपरीक्षक बिष्ट बटैलै ।
