थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ०१ भादौ २६४६, बुध ]
[ वि.सं १ भाद्र २०७९, बुधबार ]
[ 17 Aug 2022, Wednesday ]

सोनाहके जीविकोपार्जनमे समस्या

पहुरा | ३२ श्रावण २०७७, आईतवार
सोनाहके जीविकोपार्जनमे समस्या

पहुरा समाचारदाता
टीकापुर, ३२ सावन ।
बर्दियाके गेरुवा गाउँपालिकाके सोनाह जातिहे जीविकोपार्जनमे समस्या हुइल बा । कोरोना भाइरस संक्रमण फैलल्पाछे करटी रहल पेशा करे नाइ पाके सोनाह समुदायमे भोकमरी हुइना अवस्था आइल उहाँहुक्रनके गुनासो रहल बा ।

कोरोनाके कारण लडियामे मच्छी मर्ना, सोन चन्ना, ज्यालादारी कैना काम नाइ पाइलपाछे दैनिकी कष्टकर हुइल सोनाह समुदायके अगुवा घुमलाल सोनाह बटैलै । कैलालीसे सीमाना जोरल बर्दियाके गेरुवा गाउँपालिकामे सोनाह जातिके बसोबास रहल बा ।

गेरुवाके वडा नम्बर १, २ ओ ६ के राजीपुर, सर्खोल, खोटेना, कन्यापुर, सैजनामे सोनाह जातीके बस्ती रहल बा । वहाँ १०३ घरधूरीमे ४७२ जाने सोनाहा बसोबास करठै ।

सोनाहा जाति अधिकांशके जमिन नाइहो । ढिउर परिवार ऐलानी जग्गामे घर बनाके बैठल बाटै । रहलहुक्रनके फेन घरवास किल बा ।

‘खेतीपाती कैके खाउ कलेसे जमिन नाइहो, अन्य कुछ पेशा करी कलेसे लगानी करे नाइ सेकजाइठ्,’ अगुवा धुमलाल कहलै, ‘लडियामे मच्छी मर्र्ना, सोन खोज्न काम फेन लकडाउनपाछे करे डेहल नाइहो, ज्यालादारी काम फेन नाइ पाजाइठ्, हमार समुदायमे टे भोकमरी हुइ लागल बा ।’ सोनाह जाति कर्णाली लडिया किनारमे मच्छी मर्ना करिट । उहाँहुक्रनके लाउ लडियाक ढिकुवामे निकार डेहल बावै ।

‘हमार पेशा नै यिहे हो, लाउ ढिक्वामे निकारलपाछे हम्रे गुजारा कैसिक चलैना,’ उहाँ कहलै, ‘स्थानीय सरकारसे हम्रहीनहे काम डेहे परल ।’ कोरोनाके कारण मच्छी मर्र्ना, सोन खोज्न ओ मजदूरी कैना काम प्रभावित होके आपनहे ढिउर समस्या हुइल गेरुवा २ राजीपुरके कृष्ण सोनाहके फेन गुनासो रहल बा ।

‘मच्छी मर्ना सोन चन्ना नाइ पाइलपाछे बाहर काम करे जाइ पाइल नाइ हुइटी,’ कृष्ण कहलै, ‘गाउँपालिकासे एकचो खाद्यान्न राहत डेहल रहे, ओत्रसे १५ दिन छाक टारे नाइ पुगल । लकडाउन नाइ हुइल रहट कलेसे बाहिरी जिल्ला वा भारत जाके काम कैना रहे ।’ जीविकोपार्जनके लाग कैके खैना काम नै बन्द हुइलपाछे उहाँहुक्रनके समूह ओ सहकारीसे ऋण निकारके घर खर्च चलैटी रहल बाटै ।

‘एकओर काम नाइहो, औरेओर घर खर्चके लाग ऋण निकारे पर्ना आउर समस्या थपल बा,’ मनाउ सैजना बस्तीके सञ्जु सोनाह कहली, ‘ऋणसे डुब्ना अवस्था आइल बा । आब समूहमे फेन ऋण पैना मुश्किल हुइल बा । खेतीपाती नाइहो, मजदुरी करे नाइ पैली जिहीसे ऋण बह्रल बा ।’ राउटे, राजी, मुसहर सरह नेपाल सरकारसे सोनाहहे फेन सूचीकृत कैके सामाजिक सुरक्षा भत्ताके व्यवस्था करडेहट कलेसे अइसीन आपत परल समयमे सजिल हुइना उहाँहुक्रनके कहाइ बा । ‘हम्रहीनहे सूचीकृत कैके सामाजिक सुरक्षा भत्तामे समेटे परल ।

लोपोन्मुख आदिवासीके सूचीमे रख्ना हम्रे सरकारसे माग करटी रहल बाटी मने सुनुवाइ हुइल नाइहो,’ सोनाह अगुवा घुमलाल कहलैल, ‘अल्पसंख्यक राउटेहे सरकारसे महत्वके साथ पहिचान डेहल । अल्पसंख्यक कुसबढियालगायत समुदाय सूचीकृत होसेक्लै । अपने संस्कार, संस्कृति रहल सोनाह भर पहिचान विहीन रहल बाटै ।’

घुमलाल सोनाहके बर्दिया, कैलाली ओ कञ्चनपुरमे करिब एक हजार ५०० जनसंख्या रहल दाबी करठै । गेरुवा गाउँपालिकोा अध्यक्ष जम्मानसिंह केसी लकडाउनपाछे गाउँपालिकासे एकचो सोनाहहे राहत स्वरुप खाद्यान्न सहयोग करल बटैलै, ‘शुरुमे राहत डेली, फेर समस्या हुइलेसे राहत डेना तयार बाटी,’ अध्यक्ष केसी कहलै, ‘स्थानीयस्तरमे सोनाह जातिहे सूचीकृत कैके संघमे पठैले बाटी, उ बाहेक गाउँपालिकासे वडा नं १ मे २२, २ मे १९ र वडा नं. ६ मे २२ सोनाह परिवारका घर निर्माण करडेले बाटी । अवसर डेहेबर प्राथमिकता डेले बाटी ।’

जनाअवजको टिप्पणीहरू