थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २१ अगहन २६४६, बुध ]
[ वि.सं २१ मंसिर २०७९, बुधबार ]
[ 07 Dec 2022, Wednesday ]

बनल १ महिनामे सीमा सडकके कालोपत्रेमे दरार

पहुरा | १ भाद्र २०७७, सोमबार
बनल १ महिनामे सीमा सडकके कालोपत्रेमे दरार

लखन चौधरी
धनगढी, ३२ सावन ।
कालोपत्रे करल सीमा सडकमे दरार फाटे लागल बा । कैलाली जिल्लामे निर्माधिन नेपाल–भारत सीमा जोर्ना सडक खण्डके खोनपुर क्षेत्रमे कालोपत्रे करल १ महिना नैबित्टी दरार फाटगिल हो ।

ओस्टही फेन यी सडक निर्धारित समयसे बहुट ढिला बन्टी रहल बा । मने बनल सडक फेन छोट समयमे भस्के लागलपाछे स्थानीयबासी चिन्तित बनल बाटै ।

कैलारी गाउँपालिका वडा नम्बर ३ खोनपुरके स्थानीय लहानु चौधरी ठेकेदार अप्नेहुकनसे डेहल सल्लाहहे वेवास्ता करके बनाइलपाछे जेठमे हुइल कालोपत्रे असारेमे टुटल जानकारी डेलै । उहाँके अनुसार ठेकेदार सडकमे माटी पटानी करल मने सडकके लेयर अनुसार कम्पेक्सन नैपुगलपाछे १ महिनामे टुटे लागल हो ।

कैलारी गाउँपालिका–३, सुर्मीनालासे खोनपुर जैना सडक ।

भारतके चन्दनचौकीसे फूलबारी हुइटी चौमालासम ३२ किलोमिटर रहना उ सडक पूर्व पश्चिम महेन्द्र राजमार्गहे जोर्ना काम करठ । जौन अन्तर्गतके १४ किलोमिटर सडक कालोपत्रेके लाग आर्थिक वर्ष २०७४/०७५ मे नागर्जुन कन्ट्रक्सन प्रालि काठमाडौंसे १८ करोड रुपियाँमे ठेक्का सम्झौता हुइल सडक डिभिजन कार्यालय जनैले बा ।

हाल डोसर चो ठपल म्यादमे काम करटी रहल उ निर्माण कम्पनीसे २०७७ कार्तिक २५ गतेसममे काम ओरवाइक पर्ना रहल डिभिजन प्रमुख अर्जुन बम बटैलै ।

मने उ सडक अन्तर्गत कैलारी गाउँपालिका वडा नम्बर ३ स्थित मोहना लडियासे हुलाकी राजमार्गके सुर्मीनाला पुलसमके करिब २ किलोमिटर कालोपत्रे सडकके ठाउँ–ठाउँमे दरार परल हो । सुर्मी नालाके पन्जरे–पन्जरे बनल उ सडकमे कालोपत्रेके लाग मजासे बेस तयार नैहुइटी कालोपत्रे करलपाछे ढसे लागल कैलारी गाउँपालिका ३ के स्थानीय मनोज चौधरी बटैलै ।

निर्माणके क्रममे ठेकेदार आपन मनमर्जी काम करल दाबी करटी उहाँ कहलै– ‘ठेकेदारसे अत्रासम कि मनोमानी कर्ले बा कि, हम्रे सडकके इष्टिमेट मंग्लेसे फेन डेहे नैमानल । आयोजना विवरणसहितके साइन बोर्ड बिना टांग्ले काम करल । सडकमे ट्राफिक चिन्हके प्रयोग फेन नाई हो । आँखीमे ढुर झोक्ना काम किल हुइल बा । यहाँसमके कि, कल्भर्ट बनैना ठाउँमे माटीसे भाँठके निकास बन्द कर्ले बा । उ सडकमे अभिनसम लोड करल गाडी नैचलल हो । लोड करल गाडी चली टे का हालत हाुइठ ?’

डिभिजन प्रमुख बम हालसम उ सडक हस्तान्तरण नैहुइलओरसे सडकमे बिल्गाइल समस्या समाधान तथा बनैना दायित्व निर्माण व्यवसायीके रहना बटैलै । उहाँ कहलै– ‘काम अभिन जारी बा । हस्तान्तरण नाई हुइल हो । जौनकारण भसकल, बिग्रल ओ बनैना बाँकी कामके जिम्मा निर्माण व्यवसायीके हो । हस्तान्तरण हुइल १ वर्षसम फेन मर्मत सम्भार कर्ना जिम्मा निर्माण पक्षके रहठ । बनैना काम जल्डी हुई ।’

तराई मधेस समृद्धि सडक पूर्वाधार कार्यक्रम अन्तर्गत कैलाली जिल्लामे यी सीमा सडक निर्माणके काम आघे बह्रागिल हो । जिल्लाके कैलारी गाउँपालिका, धनगढी उपमहानगरपालिका ओ गौरीगंगगा नगरपालिकामे करके ४ ठाउँमे चन्दन चौकी–फूलबारी–चौमाला सीमा सडक निर्माण हुइटी रहल हो । तीन ठो स्थानीय तहमे ४ खण्ड बनाके निर्माणके काम हुइटी रहल सडक डिभिजन कार्यालय कञ्चनपुर जानकारी डेले बा ।

बीच सडकमे रुखुवा, कालोपत्रेके तयारी

उ सडक अन्तर्गत धनगढी उपमहानगरपालिकाके कनरी क्षेत्रके १२०० मिटरमे बनुवा रहल बा । कालोपत्रेके तयारी करल क्षेत्रमे २ ठो रुख कटानी नैहोके बीच सडकमे रुखुवा राखके कालोपत्रके लाग सबबेस तयार करगिल बा ।

डिभिजन प्रमुख बम कहलै–‘कालोपत्रेके काममे उ क्षेत्रमे रहल २ ठो रुखुवासे समस्या सिर्जना हुइल बा । उ रुखुवा सम्बन्धित निकायसे नैहटाइलओरसे काममे ढिलाइ हुइटी गैल बा ।’

उ सडक निर्माणसे छोटी भन्सार कार्यालय स्थापनामे सहयोग पुग्नके साथे, टमान स्थानीय तहके स्थानीयहुुकनके आवत जावतमे सहजुल हुइना बटागिल बा । अत्रही किल नाई हुलाकी राजमार्ग रहल सवारी चापहे न्यूनीकरण कर्नामे सघाउ पुग्ना बटागिल बा ।

जनाअवजको टिप्पणीहरू