बाढसे अछामके सैनिबजार पुहाइल, ६ जानेक शव फेला, १७ जाने बेपत्ता

पहुरा समाचारदाता
धनगढी, ३ भदौ । अछाम जिल्लाके रामारोशन गाउँपालिका ५ कैलाश खोलाके बाढसे सैनिबजार पुहैले बा । पुरे बस्ती पुहाईपाछे अब्बेसम ६ जानेक शव भेटल गाउँपालिका अध्यक्ष झकर साउँद बटैलै । उहाँक अनुसार १७ जाने बेपत्ता रहल बाटै ।

गाउँपालिका अध्यक्ष साउदसे डेहल जानकारी अनुसार नन्दु साउँदके परिवारके १० जाने सम्पर्क विहीन बाटै । बारला निवासी ४० बर्षिया लालसरा शाह ओ १० बर्षिय छावा फे बेपत्ता रहल बाटै । बाढसे पुहके हिक्मत शाहके २ जाने परिवार, चन्दे साउँद, बासूँ साउँद ओ जोगा साउदफे बेपत्ता रहल उहाँ बटैलै ।

रामारोशन गाउँपालिका उपाध्यक्ष सरस्वती रावलके अनुसार कैलाश खोला सैनबजार क्षेत्रमे रहल करिब १६ घर बाढसे पुहाइल बटैली । रातके आइल बाढसे भारी क्षतिपाछे नेपाल प्रहरी, सशस्त्र प्रहरी, नेपाली सेना ओ स्थानीयवासी उद्धारमे खटल उपाध्यक्ष बटैली । बेपत्ताहुकनके खोजि कार्य जारी रहल उहाँ बटैली । प्रदेश सरकारके आर्थिक मामिला तथा योजना मन्त्री झपट बोहराके पहलमे सुर्खेतसे हेलिकप्टरफे पठागिल बा ।

ओस्टेक बझाङ जिल्लाके बुङगल नगरपालिका–५ मिडी गाउँमे गैल पहिरोमे भँठके १२ वर्षिय सचिन ताम्राकार ओ ५ वर्षीय सुदीप ओखेडाके ज्यान गैल बा ।

पहिरोसे प्रताप ताम्राकारके घर भँठलपाछे दुई जानेक ज्यान गैल ओ ४० बर्सिया पिपला ताम्राकार, १८ वर्षके सुनिता ताम्राकार, १२ वर्षके सन्तोषी ताम्राकार ओ १६ वर्षके अनिल ताम्राकार घाहिल हुइल प्रमुख जिल्ला अधिकारी कमल राज भण्डारी जानकारी डेलै । घाहिलहुकनके स्थानीय स्वास्थ्य चौकीमे उपचार हुइटी बा ।